【到此一遊．台北】陳敏之唔肯食臭豆腐　區永權被迫食晒三嚿

由陳敏之同區永權主持一連十集嘅旅遊節目《到此一遊 台北》，今晚將會播放最一集。節目中雖然介紹了不少當地人先會知的「貼地」景點，但最引起討論反而係敏之在節目中種種的「港女」行為，還有唔少網友戥Albert 慘添。有得去台北又食又玩，有咩咁慘先？

罪證一 唔背稿

有睇節目嘅觀眾不難發現，有關資訊性的部分都交由Albert把口講出，而敏之就會係旁邊比下反應就算，睇嚟Albert幾乎要背晒啲稿噃。

罪證二：唔出外景

天時暑熱，台北更加唔洗講啦！有網民發現節目中大多數的外景，都係交由Albert單拖介紹，而有敏之出現嘅地方通常都會有冷氣。

罪證三：怕肥唔食嘢

明明敏之同Albert身形一樣咁fit，但Albert永遠都要以「大胃王」身份，挑戰巨形壽司同大碗麵等各種食物，而敏之只係負責計時同叫佢食。而在最後一集，敏之亦借話要考Albert味蕾，一粒朱古力都無食過。

罪證四：怕臭又唔食

節目其中一個環節係去品嚐全台灣最臭的臭豆腐，但敏之聞到臭味時已面色一沉，更堅拒做「白老鼠」。難為Albert要一個人頂晒佢，仲要俾敏之嫌棄口臭添。

Albert為敏之澄清：一早夾好晒

對於網民聲討敏之做主持唔專業，Albert就話要為敏之澄清：「其實敏之嗰段時間要趕住返香港開劇，拍攝嘅期只得17日，而我就留咗21日，所以有啲部分先會交由我一個人介紹，為咗節目流暢，先會講笑話敏之要keep fit所以唔去夜市。」有網民質疑敏之唔肯背稿，Albert就話分工其實好公平：「啲網民咁得意嘅，其實好公平嘅，拍之前分好晒。」

為表達「臭」 敏之先唔食臭豆腐

至於被人鬧得最多嘅臭豆腐，Albert就講笑話：「其實真係好臭，啲味好濃烈，畫面又好難交代點臭法，所以先夾好晒由我食，敏之唔食。雖然食之前都覺得好難頂，但食落就唔係咁臭，都幾好食，好多朋友都有問我攞地址話要去挑戰下。」Albert仲話同敏之因為節目而成為好朋友，所以好希望節目可以開第二輯，再同敏之合作添。

識睇一定睇留言，睇圖喇！