【BB來了】收視完勝《天命》　 黎諾懿：唔好講啲咁嘅嘢

劇集《BB來了》至播出後深受大眾歡迎，亦成為大家茶餘飯後討論嘅話題，今日（26日）晚上一眾演員自組飯局，由劇中飾演野蠻奶奶嘅盧宛茵請食飯。黎諾懿講到宜家開始進入演員請食飯階段，「今晚媽媽（盧宛茵）請食飯先，然後到我請，之後到Ali（李佳芯），大結局到公司請啦，開始大家有時間就會相約一起睇《BB來了》，其實拍攝非常開心，能夠聚在一起又唔係好多機會，所以趁大家冇咁忙又可以一齊出嚟食下飯先。」

至於下一餐飯諾懿已經決定由佢「埋單」，佢更想請埋劇中嘅BB同佢哋媽媽出嚟食飯，因為佢哋先係最辛苦。而《BB來了》收視更加贏了《天命》，諾懿知唔知道？「唔好講啲咁嘅嘢，大家劇種唔同姐，亦都冇諗過咁快咁受歡迎，首先多謝所有支持呢套劇集嘅觀眾，所以在此我都想賣廣告，呢套劇集已經唔係剩番好多集數。記得支持呀，因為下星期已經係結局週。」

《BB來了》呢一部小品勝在夠貼地，所以大受歡迎，對呢一點諾懿好認同，「其實呢一部電視劇會引起大家共嗚，身邊總會有一兩個人會發生呢啲事情，其實我哋偶爾拍一下呢啲小品都好嘅。」但呢幾日播出嘅劇情後，網民指諾懿呢幾集表現好唔Man，諾懿聽到後都畀一啲建議男士，「各位男士我想同大家講，記得無論婆媳關係又好或者夫妻關係又好，都要保持佛系，一出聲就會輸，到最後又自己煩，所以戲裡面嘅我覺得係好真實存在。」但講番現實之中，諾懿有冇存在呢啲婆媳糾紛？「我就冇啦，興幸我媽同我太太好好，我外母同我又好好，所以呢老公做多少少就可以粉碎。」