【過街英雄】黃翠如原來曾同森美拍電影　大家記唔記得係邊套？

TVB新劇《過街英雄》今日（25日）下午公佈造型，森美同黃翠如今次飾演男女主角。唔知大家知唔知道其實翠如已經有相近一年冇喺TVB拍劇，咁佢呢段時間做咗啲乜？翠如指唔係專登一年唔拍劇：「咁之前都休息咗一段時間，差不多一年，其實今次開工都有少少壓力，去咗學習唔同嘅事。」至於翠如呢一年學習咗乜？佢初初並唔想透露，但在旁嘅森美強迫翠如回答，翠如唯有無奈地回答：「我有跟老師去學做戲啦、去學咗做一啲運動、打鼓等等，仲有去咗一啲奇怪嘅旅行，就係平時你想唔到會去嘅地方。」聽到呢到森美搞笑講去咗地獄？翠如指並唔想太快去。

森美加翠如呢個組合，佢哋形容為大膽，因為其實二人拍劇數量並不多，翠如指自己喺TVB拍過嘅劇集十隻手指數得哂，而森美喺TVB拍過嘅劇集更加少。但其實佢哋己經唔係第一次合作，翠如憶起當年拍攝第一部電影時候嘅事：「我第一套戲有演出嘅係《我要做model》，當時我只係一個老臨，都叫做有對白，類似係講阿邊個到啦，但當我講完鏡頭已經轉走了。」森美聽完坦白回應其實已經唔記得當時佢喺到。

講番呢套劇森美係要SHOW肌肉，不過森美直言佢自己已經身材好好，唔洗特別去操Fit，咁同對手翠如會唔會都有啲感情戲有身體觸碰？翠如笑言自己乜都唔知：「我哋劇中確實有感情戲，但仲未知道會係點寫。」森美笑言畀定張相翠如番屋企對住做戲。