C AllStar單飛後首個彈出出新歌　釗峰自爆會同樹木對話

日前歌手梁釗峰作客TVB娛樂新聞台節目《StarTalk》，接受主播許文軒(Edmond)專訪，釗峰是C AllStar首位單飛推出新歌的成員，他大談箇中感受：「其實上年休團後，我哋已經迅速單飛，大家都搵緊自己嘅音樂，只不過我好似比較浮面，我地分開發展不存在競爭之餘，各有各做緊，而且大家互相支持。」

新作《月亮不代表我的心》以眼淚為題材，釗峰說自己是一個感性的人：「喺台上我容易被激情搞喊自己，但現實嘅自己係唔鍾意哭於人前，因為眼淚係會令人擔心，特別係男仔，我唔想令人擔心，就算我喊都會收埋喊。」專訪中釗峰又自爆有同理心，他說：「我行山，會對住棵樹講，咁斜你頂唔頂得到，周邊啲人會覺得我好奇怪，好似之前拍《逾越生死》MV我突然同棵樹講嘢，我啲兄弟話我又嚟，不過佢哋都慣咗我係咁。」

C AllStar當年在旺角Busking起家，問到旺角被殺街一事，他說：「依家表演模式好唔同，以前係娛樂大眾，但依家嘅表演者係有啲娛樂自己，一娛樂自己就會忽略周邊人嘅感受，我當然想保留Busking文化，但文化保唔保存到，就睇呢個空間容唔容納到呢個文化，好似C AllStar有首歌《80後時代曲》嘅一句『時代會怎麼處理』，就交由呢個時代去處理！」