黃子華重提當年感激劉青雲「埋單」青雲：大家請下大家 冇乜所謂

相信大家有睇黃子華棟篤笑都有留意到每一晚子華都會多謝某人嘅說話，就係前日（7月22日）子華台上多謝嘅人係劉青雲，多謝原因係早期舉辦棟篤笑時候並唔係一個賺好多錢工作，當時一行廿多人去高級日本料理慶功，包括青雲都有去，當時子華只係認識當中3、4人而已，廿多人食日本料理當然不便宜，不過作為主人家的子華也無奈要「萬歲」。

而當佢準備埋單時候，收銀員稱：「阿邊個幫你俾咗喇！」原來青雲已經幫子華俾咗錢，仲講咗一句，「我知道呢度好多人同你唔熟，我幫你搞掂喇！」青雲除咗係一個「好老公」，更加係一個重情重義嘅人，所以子華都好感恩識到青雲呢一個好朋友。

今日亦有機會問到青雲知唔知道子華台上多謝佢，青雲表示知道呢一件事情，更向身旁張家輝講咗一句，「聽到未呀，多謝呀！講啦，多謝呀！」家輝呢一刻只能夠用驚訝嚟形容，「我同佢（劉青雲）食飯，佢好少埋單㗎，多數我埋單㗎。」

青雲講番其實同子華相隔一段時間就會相約大家出嚟食飯㗎，「大家都會請下大食飯，冇乜所謂嘅。」問到會唔會再有機會可以一齊合作，發揮搞笑本色？「其實之前都同佢合作過，不過要睇老闆，佢宜家拍一部喜劇都幾千萬，好勁㗎，我呢啲都係痴住家輝哥叫佢帶
挈一下我啦。」