【美女廚房】蔡思貝煮嘢出奇地好味　人妻人母賴慰玲竟然最唔識煮

無綫剛播出的一集《美女廚房》有蔡思貝、賴慰玲同蘇麗珊出任女嘉賓進行烹飪大比拼，而擔任評判的男嘉賓就有陳豪、森美以及余德丞。今集3位女藝人的廚藝都不會太驚嚇，思貝同蘇麗珊更是煮得不錯，兩人煮自選菜色多寶魚時均獲評判大讚好味。最有驚喜是思貝，由處理食材到烹調菜式都有板有眼，指定菜式同自選菜式都煮得好味。反觀已經做了人妻兼人母的賴慰玲就煮得好不濟，好似唔識煮嘢食咁樣，估計她都無咩入廚經驗。

雖然思貝算是煮得之人，不過就唔小心煮到甩毛加料給嘉賓食。所講的是思貝的毛毛流蘇耳環竟然甩了條毛在餸菜上，被眼利的森美發現即夾了出來說：「我搵到條嘢呀！」場面搞笑。至於蘇麗珊雖然煮指定菜式時煮得好難食，活捉以及處理多寶魚時又呱呱叫，驚到變晒臉，扮晒慘咁樣，全程顯得雞手鴨腳，但估唔到煮完條魚出來獲男嘉賓一致大讚好味，兼且食清光。