【人生馬戲團】遇襲事件楊思琦鍾嘉欣說法不一　13年後仍疑點重重

前港姐冠軍楊思琦在今年書展中推出人生首本寫真集《MISS SZEKI ♥ 2018》，令不少書友仔排長龍乖乖「課金」。雖然最搶眼球的是書中遠赴馬來西亞拍攝的性感靚相，但最爆始終是她重提13年前拍攝劇集《人生馬戲團》時發生的遇襲、失蹤事件。

【書展2018】楊思琦重提「人生馬戲團」遇襲內幕：當時我淨係識震

思琦妹離開K場目擊：聽到好急速好響開門聲

思琦妹在寫真集中直指該次經歷是「最接近死亡的一次」，當時是05年8月，台前幕後在卡啦OK為她慶生。一行人離開慶祝場地時，思琦妹突然聽到好急速好響的客貨車開門聲，然後就見到一班人拎住開山刀、月形彎月，大鐵通向自己衝過來，她與鍾嘉欣立即逃亡：「就算中途拖鞋甩掉都不能回頭，我因為跑慢一步都會被捉到，真係好似拍戲，我知道如果被人捉到我一定『渣都冇』，其實我已經無力再跑，因為腳軟，全靠Linda（鍾嘉欣）死拉住我，後來見到草叢就一齊跳進去。」她又指自己與鍾嘉欣從草叢底望出去，見到一班歹徒跑過。

鍾嘉欣截的士目擊：十幾廿個男人拎住圓月彎刀！

不過，這個說法與鍾嘉欣3年前在衛志豪、陸浩明和區永權主持的《娛樂3兄弟》有所出入，她在節目中說：「我哋10個人一齊走，我太心急，行到最前截的士，一開（的士）度門，有十幾二十個男人，拎住咁大把圓月彎刀。」講到好似有差唔多廿個大漢匿在的士中埋伏他們一行10個人，不太合乎常理，但這個不是重點，重點是嘉欣BB和思琦妹兩人所講的匿藏地點完全不同，鍾嘉欣說：「（佢哋）追到掘頭路，我覺得我哋死梗，但唔知點解有啲磚疊到咁高嘅，有啲垃圾又係疊到咁高嘅，有啲樹枝喺呢度嘅，寧寧舍舍有咁大個窿喎，我就話『思琦，跳！』」

藏身地點有異：地窿VS草叢

一方面就指自己與對方在草叢中匿埋，一方面就指自己與對方在掘頭巷中的地窿中匿埋，二人的說法幾乎是兩碼子的事。不過，兩人的說法有些地方都是一致的，其中一樣便是兩人都指自己沒有被活捉，最後都能夠逃出生天，而另一樣便是有兇徒手執圓月彎刀……

而其實「人生馬戲團」一事的發生起因都眾說紛紜，劇集男主角唐文龍之前接受傳媒訪問時便指「可能俾人點錯相！」最有戲劇效果的說法是當年有參演的男藝人到夜店作樂時闖禍得罪「地頭蟲」，其後有人向該男藝人找晦氣，他為平息事件將兩位女演員雙手奉上……不過這個講法一出，一眾藝人都紛紛否認，指刊登內容的娛樂雜誌「生安白造」，而唐文龍接受《香港01》訪問時亦再度否認傳聞：「當然唔係我哋得罪人啦！」