【書展2018】鄭萃雯寫醫療育兒書講湊仔經 不怕過份消費主播身份
前無綫新聞主播鄭萃雯（Karen）自從去年7月離開無綫新聞部後，現時身兼多職，包括醫療網站公關工作，亦有為香港電台主持節目，最近更推出新書《兒童健康傾醫啲》，起點是Karen於2016年誕下雙胞胎男嬰「左左」同「右右」，作為新手媽媽，照顧BB時，她遇到好多似是而非的資訊。面對這方面的迷思，於是Karen以其「實戰經驗」，再總結不同專科醫生的講解，就新生嬰兒至學前幼兒的生理和心理健康問題，寫成新書。
講到寫這本書的初衷，Karen說自己作為媽媽，由孖仔BB出世到現在，她都遇到過不少問題：「無論BB瞓覺瞓唔好呀，抖氣有鼻鼾聲呀，甚至發燒呀，真係病嗰啲呢，我都真係成日煩住我嗰啲兒科醫生朋友，係咁問，咁喺呢方面本身同醫生已經有交流㗎啦。」
其次，Karen以往在跑新聞時，專門負責醫療新聞，去年辭職主播工作之後，現時負責經營健康諮詢平台，經常都有家長問她一些關於育兒的問題：「我發現當中其實有一啲呢都係我自己經歷過或者經歷緊嘅嬰幼兒呀，生理上或者心理上湊仔嘅問題，有咁嘅人脈喺背後，又有咁嘅需求，不如我又寫一本書出嚟，結合我自己嘅經驗，咁咪可以同大家開心share囉。」
花兩月寫出新作 從書中找答案
Karen寫這本書只用了不到兩個月的時間，而當中有五十幾篇內容，為了讓讀者方便快捷解決問題，在內容鋪陳上力求簡潔易明：「你當佢係一本工具書，就係問題答案，問題答案……咁樣編寫而成。」Karen指家長可以直接在目錄中找到心中的疑問，一打開書就可以好快找到解決方法，非常有針對性，避免在網上搜尋一些似是而非的答案。
【書展2018】楊思琦重提「人生馬戲團」遇襲內幕：當時我淨係識震
紀錄90%自身經歷 BB生濕疹「陪瞓」最難忘
其實這本書並非「得個講字」，除了有醫生的專業意見之外，書中所有的案例，全部都是Karen的親身經歷：「除咗最尾有幾篇係講自閉症、過度活躍症，小朋友一啲唔同嘅病症呀，點樣去醫呀嗰啲，因為我小朋友未到嗰個年紀。」當中令她體會最深的，是小朋友的濕疹問題：「好多家長都好擔心，見到BB塊面爛晒，喊唔停、瞓唔好，醫生教咗我啲小秘方，其實唔使用藥，但又可以好快控制到小朋友的情況。」在孖B出生不久之後，Karen都經歷了「左左」同「右右」生濕疹的時期：「佢哋成晚都會搲面搲到流血，我成日都坐喺度瞓覺，一個瞓左邊，一個瞓右邊，我掂住佢哋嘅，一搲呢，我就扎醒，之後撳著佢哋隻手，幫佢哋擦Cream，不斷保濕，佢哋會舒服啲。」
寫幾萬字犧牲休息時間：將自己種咗喺張櫈度唔郁！
對於Karen來講，今次寫書最大的困難並不是內容，而是過程。要出一本書，少說也要幾萬字，Karen又要工作，又要湊小朋友，還要趕在書展前出書，時間真是唔夠用：「其實喺寫書呢個幾月裏面呢，我除咗同醫生做訪問之外呢，基本上小朋友一瞓咗覺，甚至乎我一空閒放假呢，我就出咗街，搵間Coffee shop咁樣呢，我就咁狂打返啲內容出嚟，不停寫。」Karen稱自己同「自修」無異，原本計劃一日寫兩篇，但豈料一日一篇都寫不了：「結果我將所有嘢谷晒去weekend啦，或者我放假嘅時候去做啦，一次過寫9篇咁樣。我真係將自己種咗喺張櫈度，唔郁啦，然之後一杯嘢飲就由朝早飲到晚啦。」
為了避免座位被霸佔，Karen一坐就一日，連飯都不吃：「咁始終都要去廁所㗎嘛，好面懵嘅問隔離：『你可唔可以幫我看住啲嘢先呀？』然之後快手去個廁所，返嚟之後又繼續打。」這般高強度地寫書，Karen也大呻好辛苦：「嗰個幾月我係完全冇放假，近乎冇同啲細路仔玩，或者帶佢哋去邊度囉，真係要推晒畀我嗲哋、媽咪、我老公去照顧，因為有一個目標係好想完成囉。」
講到幕後功臣，Karen非常感謝6位醫生鼎力相助，不問緣由就即刻幫手；其次都要多謝老公和父母。Karen坦言在寫書期間，父母見到自己好辛苦，明明想日日同小朋友黏埋一齊，但是完全沒有假期，夜晚在Coffee shop寫完回家時，全部都已經瞓覺，「成間屋都黑晒，之後一入廚房呢，一見到媽咪整定啲餸呀，同埋啲湯呢，真係會喊出來。」Karen倒吸一口氣講到，她直言每晚回到家中都覺得好失落：「我為我啲小朋友寫一本書，但係我冇得同佢哋一齊，當然呢個係一個小犧牲啦，但係喺當下會有種好無助嘅感覺，雖然好多人支持，但好似冇人幫到我。」
再三向醫生求證內容 文字力求淺白易明
Karen做了10年的新聞主播，寫慣新聞稿的她，會不會特別注重字詞呢？「注重個內容上一定要非常之準確嘅，啲資料一定要啱嘅，咁因為亦都除咗係我自己個名之外，醫生都有份嘅嘛，咁寫完啲內容之後我有send返晒畀醫生再睇多次，確保係真同埋準確嘅，因為我都唔想話即係寫完出嚟，有人睇咗發現其實入邊個內容係錯嘅，咁樣係會好影響讀者同醫生。」Karen講到，以前記者的工作令她非常著重準確性，而這本書作為工具書，無須在內容上雕琢字句，反而要淺白易明。
不擔心過度消費主播身份：每個人都有過去！
Karen作為前無綫新聞小花，現在又出書，這樣做會不會過度消費身份呢？「我諗每一個人都有自己過去嘅工作啦，過去嘅工作經驗，對你份新嘅工作都係有幫助、有關係或者有影響，咁睇你點樣去運用你之前嘅工作經驗帶到畀你嘅嘢囉。」Karen解釋到：「例如以前做新聞工作者，可以帶到畀我嘅係一啲表達手法嘅技巧，或者同人溝通嘅技巧啦，或者係一啲信心，點樣對鏡頭等，其實呢啲我冇可能抹殺，或者撇開佢完全唔用呀嘛，咁既然呢樣嘢可以幫助到我喺另一個崗位上，繼續傳遞信息，咁有咩問題呢？」Karen覺得只要不是違背良心，或者令過去工作（身份和機構）蒙羞，並無不妥。
Karen為寫這本書，犧牲了不少休息時間，現在終於趕上書展，她也如釋重負。本周五（20/7）下午3點至4點，將會在書展舉行簽書會，屆時Karen將與大家分享湊仔經。她透露現在已經開始籌謀第二本書，依然都是講醫療，介紹怎樣育兒，教他們精乖伶俐：「湊仔有好多心酸，希望大家喺好辛苦嘅同時，可以好快搵到方法，咁就可以享受到同小朋友一齊好開心嘅時光啦。」
場地提供：雲長小龍坎老火鍋（尖沙咀）