【兄弟幫】鍾晴指流浪狗「好乞人憎」　愛狗人士聲討：佢哋想嗎？

世界上每樣事物，有人喜歡都一定有人唔喜歡，每個人都有表達感受嘅權利，不過言語上就要小心，如果唔係就好易禍從口出。噚日喺J2播出嘅《兄弟幫》，請來四位兒童節目《Think Big天地》主持人鍾君揚、鍾晴、何依婷、鄧家禮接受訪問，分享拍攝苦與樂，當中鍾晴（Karlie）一番憎狗言論，惹起愛狗人士不滿，到其網站洗版聲討，到底Karlie講咗啲咩引起公憤？

現年26歲嘅鍾晴Karlie，13年簽約做MODEL成為Cara G.師妹，曾經於15年TVB節目《超強選擇1分鐘》擔任超強女助選團時，被網民CAP圖大讚。曾經參加ViuTV《美選D.n.A》，去年初開始成為《Think Big天地》主持，另外仲有喺《愛回家之開心速遞》飾演辦公室職員，新一輯《美女廚房》亦有份擔任美女學徒。

節目中主持人BOB問做兒童節目主持嘅難忘經歷，Karlie講到一次到工廠區拍攝，一落車就見到隻大狗：「工廠區啲狗特別…毛茸茸污糟，即係好…好乞人憎嗰啲呢！」仲講到因為隻狗一直喺旁邊令佢無法順利拍攝，坦言：「自己係貓狗都驚，就算係芝娃娃咁細隻都唔得，寧願讓佢入電梯先自己搭下一架。」仲話有朋友教佢見到狗要扮唔驚，因為咁樣啲狗就唔會嚇佢：「都唔知佢（狗狗）咩心態！」

言論一出即時辣㷫愛狗人士，Facebook群組「支持領養！！救救可憐流浪動物！！」中有人寫下長文，強調「其實怕狗真係無問題，我尊重怕狗嘅人。」不過Karlie作為兒童節目主持，應該考慮到講每句說話都會影響小朋友觀感：「希望你就算唔鐘意或怕動物，都唔好話D狗好乞人憎。有得揀，佢地（哋）想做流浪狗嗎？有得揀，佢地（哋）想污糟嗎？有得揀，佢地（哋）想過顛沛流離嘅生活嗎？有得揀，佢地（哋）想擔驚受怕嗎？」「你唔鐘意或怕狗 is really fine，不過真係希望你唔好令小朋友都以為狗好討厭好乞人憎，香港已經夠多怪獸家長灌輸錯誤嘅價值觀畀小朋友，令佢地（哋）以為動物好可怕。」雖然Karlie已經多日未有Update Facebook，不過大批網友依舊到佢嘅舊POST留言攻擊。

對於網民激烈反應，鍾晴回應時先為自己的失言致歉：「今次係我表達得唔好，字詞用得唔正確，對唔住。我無心歧視狗狗架，希望大家唔好誤會。」講到節目中佢提起流浪狗時相當厭惡嘅表情，佢話：「我好細個嘅時候畀兩隻大狗追，嚇到一路喊一路跑。最後媽味抱起我救我，但係都畀其中一隻咬到腳。自此之後，我真係好驚講，每次見到狗狗、講起狗狗都會失控，今次真係對唔住大家。」