【天命】李施嬅拍劇壓力爆煲攪到鬼剃頭：頭頂甩到兩個窿咁大

《天命》播放以來，除了看譚俊彥大戰陳展鵬外，亦有不少人覺得女主角李施嬅古裝造型好靚，但靚的代價是辛苦，李施嬅日日帶接近１０磅的頭飾演戲，加上角色情緒起伏大，令她在拍攝期間出現鬼剃頭，今日李施嬅出席《天命》宣傳，亦承認當時受到困擾，她說：「當時好驚！」

李施嬅表示《天命》拍攝初期，戲份較密，試過連續十日開工，她說：「當時好大壓力，我有飾演貴妃，輩份越大，個頭就越重，啱啱壓實我頭殼頂，我連續拍咗十日，每日１６個小時壓住，可能令到頭皮唔舒服，跟住又有少少緊張，對白又多，角色情緒又低落，令到個頭甩哂頭髮，但而家無嘢喇，好返哂，甩到有成兩個窿咁大囉，甩到個頭皮係滑架，好似人哋剃光頭咁，成個面都「令」，其實都驚。」

早前有報導指李思嬅因為在無綫無獎攞，令她感到心灰意冷，但她表示自己一直好感激無綫對她的栽培，她說：「我喺《胡說八道真情假期》中，說過一點感受，當時好感動，一下子講咗好多野，有時候演員攞咗幾多過獎項好，10個影帝也好，在某一啲時間都會有可能冇信心，會有少少懷疑自己，我都會有呢啲時後，幫我攞到你個長行嘅時候，原來發覺自己係可以得，有呢個獎鼓勵係好開心，但完全冇對TVB心灰意冷嘅感覺，我呢兩個獎項都係TVB畀我嘅，今時今日我嘅演技都係佢哋栽培，其實我係出邊攞獎TVB都好大功勞，所以我好感恩佢哋比左咁多野我，我現在同TVB傾緊合約，但現在都係好初步，未有實質細節嘅嘢，但冇講過唔續約囉，我覺得TVB永遠係我屋企，我今日所有野都係佢哋畀我嘅，我唔會咁忘恩負義囉。」

 此外被問到想唔想攞「視后」？施嬅坦言「視后呢過獎每個人都想攞，但同事要睇天時地理人和要夾岩時間先可以得到，如果我要夾硬迫TVB畀過獎畀我，如果簽約就畀個獎我咁，咁啲觀眾唔服我咪仲衰，我唔想咁樣，想大家認同我嘅演技，就算一個獎都冇，我都無所謂。」