【雙面人】十年後的關楚耀：喺日本拘留所每一幕仍然歷歷在目
「人生有幾多個十年？」相信這句經典對白不少人聽過，但對關楚耀而言，回望十年前的他，一次任性，被日本警方以涉嫌違反《大麻取締法》而拘留一個多月，雖然他最後獲判無罪釋放，但這次任性，除了讓他的26歲生日在拘留所渡過外，更賠上了事業，而且傷害了身邊最重要的人。「我當時有諗過，如果返到香港唔會再有機會的話，我會選擇去做運輸，重新開始。運輸都係一份正當職業，我可以做司機、跟車。」關楚耀說。
攝影：黃國立
拍攝：黎家浩
場地：Sunny Idea
髮型：Ian Wong
化妝：Hetty Kwong
歌手關楚耀（阿關），其父關維麟是「樂壇校長」譚詠麟的唱片監製，2006年經契爺譚詠麟介紹入行成為新人，當年於四大頒獎禮拿下不少新人獎項。阿關一出道便得到不少圈中人愛錫，唱過不街知巷聞的作品如：《你當我什麼》、《悲哀代言人》，與謝安琪合唱《四面楚歌》後更為人所識。2009年他卻因一時任性，與當時女友遊日期間，被當地警方以涉嫌違反《大麻取締法》為由拘捕。雖然最後獲判無罪釋放，但他在拘留所的一個多月，讓他上了一生難忘的一課。
十年前：我係一個冇腦嘅人！
「十年前嘅我係一個冇腦嘅人，雖然而家都係，但十年前嘅我係更加冇腦。可能由細到大屋企人都好錫自己，好多事都好照顧我；到成為歌手之後，一樣有好多前輩幫我、照顧我。十年前嘅我覺得好多嘢都冇乜所謂，有就有，冇就冇，好多工作機會都係試下玩下，我唔會明白機會有幾難得。點知喺日本一玩就玩出禍，我覺得自己嘅責任好大，無論自己任性、貪玩、身邊朋友影響，但只要自己唔願意，冇人可以逼我做我唔願意嘅事，所以終歸都係自己問題。」
吸食大麻被捕
阿關憶述十年前被捕的場面，種種細節仍歷歷在目：「十年前，我因為一時任性，做咗一樣非常後悔嘅事，我同當時嘅女朋友到日本旅行，玩出禍，當中有吸食大麻，最後被鎖入拘留所。」
他續說：「當年我被警察拘捕時，心情不知所措，我第一個反應就同女朋友講『你係咩都唔知，咩都唔使講，其他事等我嚟處理。』我記得當時係晚上9點左右，去到拘留所被警察盤問，當時有一位中國人翻譯幫我溝通，跟住落口供直到凌晨。我初時諗，應該會冇事，點知最後被拘留咗個幾月，連26歲生日都喺拘留所中度過。」
遇上江湖大佬 學習拘留所規律
提到在拘留所的生活，阿關雖然面對語言不通，但他興幸當時有「鄰居」幫忙，協助他適應當時的日子，阿關憶述：「拘留所入面，每日我都要按時打掃，入面冇床，全部人都係用『塔塔米』瞓覺。我記得第一晚入倉嘅時候，有三個日本人同倉，我咩規矩都唔識，又唔明白佢哋嘅文化，其中一位貌似江湖大佬嘅人，佢教我入面嘅規矩，教我鋪『塔塔米』，話畀我知咩時間要起身打掃。」
父母赴日探監：每次諗起都情緒波動！
在日本被捕期間，阿關在拘留所生活了一個多月，在這段時間，他經歷了後悔、內疚、慚愧和反思，他明白要對自己做過的事負責。還記得父母第一次到拘留所探望，他深深體會到「慚愧」一詞的意思：「我媽媽爸爸專程由香港飛到日本探我，情景好深刻，好似電影電視情節一樣。當時有爸爸、媽媽、律師、翻譯在場，我同爸爸媽媽隔住玻璃互相對望，大家咩都冇講只係不斷喊，我又將手放喺玻璃上，而媽媽又將手放喺玻璃上，雖然大家接觸唔到，但當時真係感受到佢哋嘅溫暖、支持、鼓勵。而呢一份溫暖我到呢一刻我仍然感受到，所以每次我想起呢件事，都會令我心情複雜，情緒波動，我覺得自己好對唔住我嘅父母，我真係覺得好慚愧，點解我可以咁戅居呢？」說到這裡，阿關情緒似乎也受到不少波動，眼有淚光的他對過去的事依然記憶猶新。
「喺拘留所嘅日子我反問自己好多問題，『點解自己咁任性？點解我會做出咁戅居嘅事？點解呢啲事情會發生喺自己身上？』原本去個旅行開開心心，最後發生一樣後悔一世，最對唔住我父母嘅事。」關楚耀說。
回港後不敢外出 母親受情緒病困擾感內疚
很多年青人誤認為，只要對自己做過的事「攬上身」，便可把身邊人的傷害減至最低，連阿關也不例外，但他沒有考慮到這件卻令最愛的媽媽深受情緒困擾。「我媽因為『日本事件』事件而有情緒病，我返到嚟香港之後，佢又因為長期受到情緒困擾而『生蛇』，身體狀況好差。當我發現嘅時候我真係好慚愧，冇諗過因為自己嘅錯，傷害到身邊嘅親人。」
關楚耀返港後，沒停過反思，在香港他足不出戶，面對現實：「頭三個月我唔敢出街，收埋自己，就算出街我都係坐車去親戚屋企食飯，食完飯就直接坐車翻屋企，有時會喺車入面由車窗望望周邊發生嘅事。當時情緒、工作各方面都好低潮，要面對現實，有好多傳媒追訪，身邊嘅家人以至圈中朋友都受到影響。整個過程足足過咗九個幾月，呢段時間我用音樂去發洩自己嘅情緒，慢慢我就開始作曲，寫咗幾首歌。之後我就去到香港超過50間不同嘅中小學，以過來人身份去分享自己做過嘅事，包括犯錯時嘅心情，做錯嘅原因。坦白講，同學生、師長分享之前我，真係唔知佢哋會唔會接受我，而最後我從佢哋身上得到好多支持及鼓勵。」
十年後：先想家人，後想自己
對關楚耀來說過去十年，他經歷很多反思，不論對自己做人處事，與家人的關係，他坦言，現在的他百行以孝為先：「我爸爸十年前有一句說話提醒咗我，佢話『好彩你後生嘅時候發生呢件事，令你可以反思，反省，令你可以成為一個真正嘅男人。』以前嘅我唔會為人設想，做事亦永遠唔會想後果，不理父母意見，就算與佢哋反面，只要自己開心我會一意孤行。自從『日本事件』之後，我處事態度相對成熟，我學識做決定前先諗人感受，會考慮呢個決定會唔會影響身邊人與事，有些事只要令家人開心或者幫到人，就算我不願意我都會做。」
不打扮深夜逛街拍照 做最真實的自己
作為藝人，言行舉止以至工作的選擇都有束縛，因為藝人所代表的不單單是自己而已，他說：「我真係好鍾意『藝人』呢份工作，因為可以每日見唔同嘅人，做唔同嘅事。同時，藝人係一份食得咸魚抵得渴嘅職業，要顧及自身形象，亦要顧及公司利益。以做音樂為例，我當然想做一啲自己喜歡嘅音樂類型嘅作品，雖然公司有放手畀我做，但我都要顧及公司收入，歌迷嘅感受，既然公司有投資喺我身上，我都要諗點樣可以幫公司賺錢。但講到影相，我就唔需要理會對人嘅束縛，我影相時唔需要理公司，其他人嘅目光，我好鍾意半夜唔打扮真接走落街影相，用鏡頭去睇出面嘅世界係一種自由，放鬆，係一真真正正嘅關楚耀。」