【開心速遞】張景淳重返劇組　同長腳蟹再續前緣：要有啲暗戀感覺

張景淳之前於《愛·回家之開心速遞》入面飾演龔燁一角令人印象深刻，不過卻因為另有工作安排而要離開劇組，令到觀眾同網民都好唔捨得，景淳自己亦好唔捨得。今日該劇舉行活動宣布再添食180集，他亦有出席，並正式宣布重返劇組。景淳表示：「係啱啱添食前返嚟嘅，已經拍咗幾集，公司想保持神祕，所以之前唔講得，第幾集出場都唔講得住，希望大家留意每一集，總之暑假會出場，如果係粉絲就一定會知嘅。」

他指自己之前因爲要拍《鐵探》加上有其他工作而要離開劇組，今次回歸會繼續飾演龔燁，延續同熊尚水 (呂慧儀飾) 的感情線。景淳說：「之前我走，大家都覺得好突然，好開心知道網民都想睇呢個角色，我一直想入返劇組，自己都有表示話想返嚟，監製同編審佢哋亦都有呢個意思。今次再演呢條線有啲難度㗎，之前習慣咗同阿蟹 (呂慧儀) 鬥，依家就要由朋友開始，兼又有啲暗戀嘅感覺，要揣摩下，我每日都喺度揣摩緊。」據知張景淳離開《開心速遞》一集，是該劇收視歷史新高，故今次監製找他重返劇組，似乎有意再創收視成績喎！