【開心速遞】大小姐同送水輝終成為戀人　將有強勁情敵出現硬撬

無綫處境劇《愛·回家之開心速遞》今日(4日)舉行活動宣布會再添食180集，全劇幾乎總動員出席造勢，還有珍姐 (曾勵珍)、該劇監製林建祥、編審李綺華及袁寶慧等，場面熱鬧。劇中多對CP均大受觀眾同網民歡迎，其中就以大小姐 (林淑敏飾) 與送水輝 (許家傑飾) 最有人氣，兩人的感情線發展令大家都睇得好肉緊。昨晚播出的一集更引起網民熱烈的討論，話睇到好感動，又大讚兩人演得好。而大家最關心的當然是兩人到底會否成為情侶啦。

林淑敏 (Mandy) 同許家傑就預告大小姐同送水輝確是會發展成為情侶的，Mandy說：「至於係點樣開始呢？由咩關係開始就要賣個關子，會開始得幾得意嘅，出人意表咁好睇。」家傑亦不肯透露半句。提到昨晚那集有不少網民表示感動到喊，大小姐表示：「我當初睇劇本時都有喊，寫得好好，真係好感動，令人好動容，導演好畀心機拍。」家傑又指該劇投放了好多資源去製作。

對於有網民讚家傑的演技有進步，大小姐即說：「佢不嬲演得幾好，唔係咩進步咗，係好之外可以更加好。有好對手好重要，佢帶到我入戲，我哋大家互相幫助，演技無頂，希望可以衝破。」家傑就大讚Mandy說：「大小姐真係演得好好，喜怒哀樂，起承轉接都無得彈。」原來兩人就算不用開工，都會私底下相約出來對劇本，非常認真同專業。問到稍後黎振燁是否加入做第三者同送水輝爭大小姐，他們就話暫時收到的劇本未寫到，不過編審同監製就劇透了黎振燁的第三者角色，笑言：「唔可以畀大小姐同送水輝咁順利嘅。」