家燕姐激讚新抱煲湯一流　抱孫隨緣：唔想俾壓力佢哋！

薛家燕今日（3日）出席鮑魚宴時暢談和媳婦相處的點滴。家燕姐的二子最近和女友完婚，問到家燕姐有否教媳婦煮飯，家燕姐笑說：「佢兩個啱啱結完婚無耐，又去咗度蜜月，我都無時間教，遲啲等無咁忙先啦。其實都唔可以話教，大家交流下廚藝心得，因為我新抱煮飯都有一手，尤其是煲湯，佢啲湯簡直係一流，我都飲咗成年幾兩年。」家燕姐對媳婦讚不絕口。那家燕姐是否很渴望抱孫呢？她說知道媒體都有很多類似的報導，指她恨抱孫，「我都有同佢地兩個傾過，我唔想俾壓力佢哋，因為佢哋工作上已經排到密密麻麻，如果有孫咁自然開心，無都唔緊要，可以慢慢等，總之一切隨緣。」

談到家燕姐及鮑魚美饌，不少人都會聯想起《食神》，家燕姐亦化身「食神」分享了烹調鮑魚的心得：「鮑魚一向畀人嘅感覺都係富貴，不過煮鮑魚係好考功夫，好彩依家有啲方便裝鮑魚，我哋可以一放工返屋企就將鮑魚翻熱嚟食，呢個都係我哋繁忙都市人所嚮往嘅生活方式。」