【 天命】無綫又篡改歷史　陳展鵬清朝時代送膠俾太上皇

大台劇集雖然近年質素略為提升，但道具製作依然係粗製濫造，唔少觀眾追劇之餘，更愛搵錯處。經典如將手機電池當作是偷聽器、又或是清朝宮殿上出現烏龍茶膠樽………而剛開播的《天命》，又被觀眾發現有bug，上星期其中一集講述張國強飾演的太上皇，因在在新一年開始就吐血又搞到大家有得震無得瞓，而為令朕一笑，陳展鵬除了拎出太上皇最愛的甘草梅之外，更陪佢去同一班侍衛賭牌九。

賭局開始前，太上皇拎出自備的透明骰仔，之不過，有網民就認為呢幾粒骰點睇都似係塑膠製，但明明乾隆時代應該仲未有塑膠出現……反正《深宮計》也能出現紙巾，TVB是不存在不可能的。講返呢幾粒骰仔，其實喺 第一集時太上皇收到各國送來的賀禮時曾閃現過，比起翡翠玉璽、豹皮等名貴禮品，太上皇拎住個布袋表示得十分滿意，更指「和坤的確深知朕的心意」，原來袋中放有陳展鵬命人送上的骰仔。嗱，話晒都係送俾皇上，所以呢幾粒骰仔絕對有可能係用琉璃製，而琉璃早在戰國時代就已經出現。