【專訪】趙勁皓錯有錯著投資科研：依家發展到我唔知點形容
趙勁皓16歲已開始半工讀，在打工的酒吧遇上了現在的生意拍檔，以三人之力由一間鋪變為七間，再由香港北上發展，他說近年的經營模式最緊要是有錢齊齊搵，並不擔心人多口雜，陳柏宇就是這樣「落搭」的。
趙勁皓說自己善於應酬、酒量好，另外兩位股東一個善於管理一個善於理財，三人剛好互補不足，雖然偶爾會有意見不一時，但就從未試過講錢失感情。深圳酒吧開業在即，向來負責管理酒吧以及健身房的他理應瞓身，奈何他已經是個有家室的人……「佢哋有俾我揀去深圳衝定留香港，因為深圳隨時搏到有人賞識，俾錢開十間八間。但如果我真係要去build up會失去好多，最怕係個女嘅成長時光無咗，兩個拍檔覺得我係浪費咗自己……對我來說係一個幾嚴厲的責罵。」
趙勁皓早年因電影而與盧頌之（DaDa）撻着，去年二人升格為父親，囡囡趙安嵐在訪問期間亂入，趙勁皓看著她牙牙學語的表情如同擁有了全世界一樣，說實在，又點會捨得衝。而他亦承認本身因為要打理鋪頭所以陪囡囡的時間已經唔多，如果再北上的話，囡囡隨時連老竇都唔認得。深圳的酒吧將會以sports bars模式運行，內地雖然已有不少同類型，但因為缺乏完善規則，所以一直做唔起。「上海有一間係搵半裸男模做裁判，內地人有gimmick就會覺得好玩同威，而我哋就會搵台灣game girl註場，其實香港sports bars已經飽和，雖然我經營的生意仲幾好，但係時候去其他地方試。」由於與拍檔都係第一次北上開鋪，所以遇上不少問題，交吉至今半年有多仍未能夠開業，對他們來說也是上了非常寶貴的一課。
飲食王國的股東除了趙勁皓與另外兩位拍檔之外，近年他們亦會邀請不同的股東加盟，完全不擔心人多口雜。而向來只有影視發展的趙勁皓，近年卻招來隱世歌手陳柏宇做股東。「Jason拍戲時識咗我健身教練，佢份人好好傾、好有理論，亦好有自己諗法，佢覺得除咗演藝事業之外，都應該要做生意，所以由酒吧開始，間間鋪都預埋佢。」趙勁皓說陳柏宇對他們十分信任，有時甚至也不會問詳情就直接「過數」投資。「佢唔係醫生但所提供的意見比醫生還要多，仲要佢講英文又幾好聽（笑）當佢講啲你未必聽得明嘅英文時，成件事就好似好有說服咁，做生意都係一樣。」做生意至今，雖然未蝕過錢，但趙勁皓就希望健身房可以做得更好。「一班教練將自己的青春留比晒我，但鋪頭收入afford唔到佢哋將來，萬一將來租金太貴要執……所以我希望可以做得更好，令佢哋收入更穩定，酒吧都有叫佢哋份少少股，有錢齊齊搵。」位於佐敦的健身房有個閤樓，閒時一齊圍埋打機、吹水，感情就是這樣慢慢建立出來的。
在云云生意中，除了飲食同健身之外，原來趙勁皓早在數年前也開拓了科研一項，雖說自己都唔知投資了什麼，，但回報卻是最高的。「一開始係做環境，裝咗嗰樣嘢之外就可以慳到冷氣費，因為朋友無做生意經驗，於是叫我提供意見，自己夾咗十萬左右，無乜期望架，但半年前公司突然擴展得好勁，連舞台效果代理都做埋，又搵咗內地寫apps好勁嘅人返嚟。其實係因為有個partner對呢間公司好有期望，落手落腳去做，搵埋投資者……依家發展到我已經唔識sell 。」近年香港銳意拓展創新科技，財政預算案撥款500億元，趙勁皓錯有錯著發展了這一項目，難怪他說比飲食的回報更厲害。