【開心速遞】細龍太陳偉琪熱愛籃球　有姿勢有實際網民讚：好波！

無綫處境劇《愛‧回家之開心速遞》入面的細龍太Jenny (陳偉琪飾) 成日都打扮靚靚以貴婦look示人，同大小姐 (林淑敏飾) 權鬥爭寵係她的日常。不過現實生活中的陳偉琪 (Vicky) 就同細龍太好唔同喇，Vicky最鍾意做的絕唔係搞是搞非，而係做運動，更加是一個籃球健將。近日就有網民於討論區重溫Vicky之前打籃球的片段同靚相，大讚她好波，完美示範咩叫做有姿態有實際。

Vicky小學時期已經開始打籃球，她接受電話訪問時表示：「我咁鍾意打籃球其實都關我爹地事， 有次爹地入咗去我間小學個籃球場，離遠45度角穿針入波，我覺得爹地嗰下好型，所以自己都想打好啲籃球，我到6年班就做咗籃球隊隊長。」她在加拿大生活時，由於仍未有膽落街場打波，她的爹地媽咪就會駕車載她周圍去搵球場練波。」

現在Vicky一有時間就會落去街場跟隊打波：「因為工作忙好難可以約到成班朋友一齊打，我通常會去維園同修頓跟隊打，都識咗啲波友㗎。我唔介意同新朋友打，睇下人哋唔同嘅打法。」大家如果想同Vicky打波不妨去呢兩個地方撞下她。她又謂小時候也試過打波受傷，但現在不會了。「依家最緊要打得開心，出一身汗，都會就住打盡量避免受傷。之前同細龍生 (鄭世豪) 打就唔小心拗柴，扭傷左腳，到依家都仲有啲痛。」

Vicky話自己最瘋狂時會日日打，甚至試過着住條cocktail dress打。問到樣靚身材正的她打街場可有畀人撩，她說：「唔會，因為我好好勝，唔會hea打，啲人知道我唔係嚟玩嘅。我試過跟場時話跟隊，畀人話『你都打呀？』，最初佢哋完全唔mark我，唔理我，無視我嘅存在，但當交咗個波畀我之後發覺原來我係識打嘅，反而會問返我打唔打多幾場，對我會有respect。」

一齊睇相睇下Vicky有幾好波