【走佬去臺灣】阿澤爆莊澄當年為《閃靈》改名　寇比力克越洋勁讚

俗語有話「不怕生壞命，最怕改錯名」，可見名字對於一個人來講有幾重要。其實電影亦然，在製作方面固然重要，而名字更是一套電影的「敲門磚」。

近日，杜汶澤在ViuTV節目《走佬去臺灣》中，講到自己覺得最令香港人驕傲的電影譯名，是由莊澄先生翻譯的《閃靈》（The Shining）。阿澤指Shining，即係閃的意思，電影是套驚悚片，而這個戲名兼備音譯和意譯之餘，還詮釋出電影內容，非常巧妙，阿澤還說當時《閃靈》導演史丹利寇比力克（Stanley Kubrick）特登寫了一封信讚揚莊先生，真是厲害。

莊澄是香港電影編劇家協會主席，資深監製，創作出身的他，為香港電影改過不少大家耳熟能詳的名字，好似《無間道》、《春嬌與志明》、《末日戰士》（Mad Max 2：The Road Warrior）、《未來戰士》（The Terminator）等等，對改戲名非常有一手。

《閃靈》對於香港有這麼大的影響力，那麼莊澄是怎麼樣想到的呢？他在接受《香港01》訪問時，指史丹利寇比力克（Stanley Kubrick）希望《The Shining》的中文戲名發音可以和shining發音越接近越好：「shining就同閃好似，咁我再加多一個靈囉，其實無咩難度嘅，好短時間諗到，難就難在要諗多幾個畀香港負責人揀。」莊澄當時在電影公司做copywriter，而《閃靈》這個名字亦是由他自己創作。講到被寇比力克寫信讚賞，莊澄亦覺得很開心，但那封信就並未保留。

國外電影的名字同場會有兩種改法，一種是音譯，一種是意譯，莊澄直言自己是根據故事去改名字，就並非純粹音譯：「譬如話《The Terminator》，台灣就譯為《魔鬼終結者》，但係我睇呢個故事呢，喺講未來嘅嘛，呢樣嘢係好新嘅，以前未拍過呢啲嘢，咁所以我就改咗用《未來戰士》，我主要係睇嗰個故事，嗰個內容。有啲西片呢，佢就係嗰個內容起嘅，咁我就覺得唔使點改。」莊澄改了這麼多年戲名，他自認最難的地方就並非構思方面：「最棘手嘅地方就係當你唔係權威嘅時候囉。（即係可能有時自己鍾意嘅名佢哋唔揀？）係喇，或者佢哋會覺得你鍾意代表乜嘢呢？但如果你係一個權威嘅時候，你鍾意就代表好重要嘅嘢喇。」

莊澄改過這麼多大家耳熟能詳的作品，阿澤在節目中自認《閃靈》最令人驕傲，而莊澄都覺得這是自己最滿意的作品之一，但他最自豪的是《轟天炮》（Lethal Weapon）：「因為我係嚴重違反（海報內容），尤其係西片，佢嘅poster是兩個人嘅嘛，一個黑人（Danny Glover），一個Mel Gibson，咁但係我唔覺得個戲主要係兩個人囉，我覺得個戲主要係一個人，呢個人嘅爆炸力好強啦，咁所以我就覺得呢個先係。」內容對於一套電影來講有舉足輕重的位置，能夠提取電影的精粹，短短幾個字要體現出電影的主旨，吸引觀眾，實在並非一件易事。