薛家燕娶新抱個個著「褂皇」係咩玩法？ 非為搶鏡只係跟足傳統
薛家燕娶新抱好似華人界嘅盛事一樣，事前大家都期待佢會唔會再著「龍袍」現身飲新抱茶。6月11號石耀庭同ZOE終於圓婚，家燕姐件龍袍就唔見影啦，婚禮相片一樣睇到大家嘩嘩聲，除咗好似無限手套咁大嘅立體龍鳳鈪好吸晴之外，家燕姐同新抱仔著上9成9相似嘅裙褂，仲有一張大合照有成8個著裙褂嘅家人，都令大家不禁笑問：「到底邊個先係新娘呀？」呢次為婚禮製作中式禮服嘅老字號繡莊負責人黃國興師傅就話：「大家喺度計個婚禮用咗幾多百萬，其實忽視咗淨係裙褂都已經過百萬啦。」
大家平時去婚禮通常只見到新娘子著裙褂，今次足足7位長輩著裙褂難怪令人疑惑，黃師傅就話：「其實六七十年代香港嘅婚禮，大戶人家富豪婚禮，長輩係全部都會著上「褂皇」，係身份嘅象徵，係香港以前嘅風俗傳統。家燕姐嘅姐妹可能比較早期移民，佢地停留喺以前婚禮長輩都會著裙褂嘅觀念，其實只係跟返傳統。」網友誤會家燕姐搶鏡，其實應該多得佢令新一代認識呢個傳統。
「褂皇」到底係咩嚟？裙褂其實有好多款，大致上以金銀線密度分為小五福、中五福、大五福、褂后、褂皇，當中褂皇嘅金銀線密度高達100%，傳統上全人手製作每件要用上十多個月製作而成架。90年代起香港新人開始只著西式禮服，令裙褂一度息微，直至09年楊千嬅結婚時，著上「褂皇」拍攝嘅婚照，令大家重新認識中式傳統之美。
「今次幫家燕姐佢地訂造咗8件裙褂，包括新娘子、家燕姐同佢4位姐妹，外母以及新娘婆婆，加埋超過100萬，其中有6套係屬於「褂皇」，傳統上係應該大家一式一樣。不過呢次設計上我地花咗少少心思，好似家燕姐身上嗰件，內層布料係金色，而新娘子係用咗大紅色；家燕姐4位姐妹嘅裙褂，祥雲係用上白色做主色，大合照時就會睇出有啲層次。」
黃師傅話依家都有唔少港人結婚，會租埋裙褂俾家中長輩穿著，媽媽裙褂都可以係褂皇，只係依家普遍香港人租裙褂時，長輩可能唔想搶新娘子鏡，就會揀無咁多金銀線嘅裙褂，簡單嚟講60歲以下奶奶外母通常著棗紅色，60歲以上婆婆輩就通常揀紅黑色。