雷莊𠒇準備離港發展　港姐宣傳片都冇份拍改由劉穎鏇頂上？

2017年度《香港小姐》冠軍雷莊𠒇（Juliette），昨日出席《2018香港小姐競選》公開招募行動，Juliette呼籲各位要鼓氣勇氣嚟參賽，佢分享經驗話比賽並唔係重點，因為佢自己之前參選時，認識咗一班好姐妹，喺自己人生當中佔有一席之位，所以都希望大家除咗比賽之餘，亦能認識一班親如手足嘅好姐妹。

其實Juliette當選後負評不斷，早前更講到喺香港浪費一年時間，準備回去加拿大發展。而未知道是否因為Juliette呢個舉動，所以有指劉穎鏇（Tiffany）頂替佢嘅位置拍攝《2018香港小姐》宣傳片。Juliette：「呢個係公司安排，都唔會講唔開心，我都想..都希望有工作，都想參與個宣傳片上，可能嗰刻我係加拿大或者schedule唔方便，有好多原因我自己都唔知，its life有時係unfair，自己professional最重要。」Juliette都表示公司因為咁樣安排所以令到自己冇太過忙碌，又可以專心做運動。TVB為Juliette安排嘅工作量，其實遠低於早一兩屆嘅師姐馮盈盈及麥明詩，Juliette自嘲回應話：「其實拍劇都會有機會，不過可能自己中文要更進步多一點，或者仲有其他原因。」

至於另一個問題就係，決賽當日傳統上會由上一屆港姐冠軍，為新一屆冠軍戴上后冠嘉冕，但而家TVB俾Juliette嘅工作已經少之又少，未知道決賽當日會唔會連后冠都唔使佢幫手戴呢？ Juliette聽到之後諗咗一陣，語氣好唔確定咁話：「I think so，I hope so，我都唔知道，公司都有好多唔同嘅決定。」