首集播出負評如潮　美女廚房之父錢國偉：節目唔係一嚟就驚天動地

新一輯《美女廚房》自星期六（2/6）播出第一集後劣評如潮，有大批網民對主持林盛斌（Bob）、蕭正楠及張振朗的表現完全唔收貨，無論嘉賓評判農夫同洪永城有幾搞笑都冇用。

記得當年第一輯及第二輯《美女廚房》由錢國偉監製，鄭中基、梁漢文及方力申主持，播出後大受歡迎，最高收視突破42點，更打破《超級無敵獎門人》紀錄，成為最高收視的遊戲節目，唔少網民都表示好懷念主持同嘉賓玩得好癲喪。最經典就是第二輯第13集，由日本模特兒椋名凜炮製的米線發出惡臭，梁漢文即時嘔吐，連黃宗澤更用白花油嗽口，還有現場觀眾試食後食物中毒，入住ICU兩天！

既然爆出負評，究竟首兩輯的監製錢國偉（Wilson）覺得節目如何呢？Wilson接受《香港01》訪問時，表示大家只看了第一集就下定論有點不公平：「雖然我未睇，但係好難去同第一代作比較，因為大家都會先入為主。以前都冇預算到出嚟嘅效果。」談到嘉賓方面，過往邀請了不同演藝界別的美女擔任嘉賓，但新一輯《美女廚房》只局限於無綫女藝員，問到Wilson可會覺得乏味？他直言：「一個新嘅節目要畀啲時間發酵，節目唔係一嚟就驚天動地，畀機會睇多幾集先。」

主持對於綜藝節目可說是最重要的元素，談到今次由Bob、蕭正楠及張振朗代替鄭中基、梁漢文及方力申，Wilson覺得由Bob主持很合理，謂：「做綜藝揀主持要搞笑，所以嗰時有鄭中基，穩陣就有梁漢文，再有後生嘅方力申，Bob都搞笑啊，又有後生仔，都要畀時間去接受。」至於提到有唔少網民都很懷念Wilson監製的《美女廚房》，他笑言最難忘一定是「地獄廚神」及真正的「美女廚神」蘇玉華：「一個天堂，一個地獄。主持方面，梗係最難忘Ronald嘅抵死演繹！」