【偽鈔案】TVB管有大量道具鈔票會出事？　金牌監製話你知冇可能

曾為電影《樹大招風》、《迷城》提供道具鈔票的道具公司男東主張偉全，因2016年被警方在其公司搜出22.3萬張道具銀紙，而被控管有偽造紙幣罪名，法院昨日（31日）裁定罪名成立，令電影行業非常震驚。除了電影，拍攝電視劇好多時都需要用上道具紙幣，近年最令觀眾記得的必定是無綫劇《巨輪II》中，「鷲哥」吳岱融向李佳芯（Ali）拋錢兼講出經典對白「攞去使啦，臭雞」一幕。有關判決會否代表住以後電視台都拍唔返這種土豪味濃、嫌錢腥的霸氣場面？監製王心慰（Amy姐）接受《香港01》訪問時答謂：「TVB唔會因為用道具銀紙而出事。」

唔通TVB真係大晒？咁當然唔係啦，Amy姐補充時就話不會出事是因為TVB拍劇必定跟足指引，完全合乎法例：「我哋拍劇如果要用到道具銀紙，一定會交好所有申請文件，我哋公司本身都管呢批道具紙都管得好嚴密，亦Mark好晒Number，政府都有呢個數字，嚟嘅時候拎咗幾多張，返嚟就還返幾多張，一張都唔可以少，所以唔會流出到去出面。」即是「臭雞」一幕拍完後，工作人員要夾手夾腳執返起啲銀紙再入倉？Amy姐話：「其實好多時電視機見到啲『錢』都係掩眼法嚟，例如用Wide Shot拍搞到睇落似錢咁。」那麼TVB的真‧道具銀紙是怎樣？Amy姐答謂：「有『道具』兩隻字喺度，兩隻字嘅Size係大到直頭連盲嘅都睇到，而且個紙質同真嘅錢爭好遠。」