情慾錄音女主角再有女子中槍 林子善籲唔好再估：講出嚟無意思
林子善剛於今年4月新婚，同老婆Kary恩愛甜蜜，亦不時於Instagram上載合照放閃，林子善予人專一好老公的形象。可是，今日竟然有報道指林子善於2年半前與Kary由分手直至復合的短短個多月真空期，曾力追一名圈中L姓女藝人，林子善與該名女子的情慾錄音也被公開了，內部提及：「我攞咗啲預防愛滋病嘅避孕套。」、「我正在床上，聞你殘餘的氣味。」令人嘩然。事件中的男主角林子善之後已回應了有關報道，承認於2016年初與Kary分手後曾跟圈中人拍拖。
雖然林子善並沒有透露該名圈中人是誰，但就有猜測指女主角是現年28歲的歌手黃思迦。 思迦接受電話訪問時表示：「好搞笑，唔知點解會咁傳，我完全唔識佢，當然無見過面啦，就算係工作上都無接觸過。可能係認錯人，因為我男朋友有少少似林子善，而我自己都成日畀人認錯係第二個，會畀人認錯係莊思明。(畀人話係第三者會唔會唔開心？) 有啲委屈，好無奈，真係躺着也中槍，根本唔關我事。」
至於林子善接受電話訪問時亦為黃思迦作出澄清，他說：「唔係佢呀，其實我唔識佢㗎，要同佢講sorry，實在唔想令到無辜嘅人受到牽連。」另外討論區則有網民開post估女主角是曾跟他於電影《鴨王2》合作過的林莉嫻，子善說：「呢個仲搞笑，佢係我公司同事，我連佢電話都無，講過10句嘢都唔夠，淨係喺《鴨王2》合作過一、兩場戲。」他堅決不肯透露女主角是誰：「人哋攻擊我，我無理由就要攻擊返佢，講出嚟無意思，我唔會做啲損人不利己嘅嘢。」
子善對於今次被公開情慾錄音搞出個大頭佛，他以食魚生食到肚痛來形容：「係自己唔好彩。不過都好彩我走得快，好彩我去搵返我老婆。我同嗰個女仔一齊咗好短時間，個零月左右，見面唔夠10次，係好和平咁分手，之後亦有互相問候。我覺得唔一定要變成敵人，大家可以做返朋友。佢可能鑽緊牛角尖諗埋一邊，我結婚前佢仲話要送份賀禮畀我，之後就send啲錄音畀我老婆。我問我老婆信唔信我，佢話信，話我以前係點唔重要，依家係點先重要，佢好了解我為人，我哋身邊朋友有第三者，我知道都會好滾，所以我自己一定唔會有第三者。」
他還叫大家不要再估那個女仔是誰：「佢10幾年前已經退出咗娛樂圈，當初一齊係我諗佢會明白我諗咩，結果大家性格不合咪分開，合則來不合則去，唔係咩𡁻完鬆，既然發覺唔啱大家就梗係分開啦，無謂唔啱都仲繼續浪費對方時間。佢攻擊我唔緊要，我會企出來講返件事。」