【開心速遞】周嘉洛希望挑戰高難度角色：會演得開心啲同享受啲

周嘉洛於《愛‧回家之開心速遞》入面飾演的金城安，完全是現今呢代年輕人的寫照，他亦以自然的演技演活了這個角色。那麼他又覺得自己似唔似金城安呢？嘉洛表示：「其實金城安係包含咗周嘉洛喺度，我自己本身都鍾意打機，又比較懶散，鍾意hea，唔係好積極，比較被動，同金城安差唔多咁廢。」話雖如此，不過嘉洛強調自己在工作方面絕對不敢怠慢。

作為一個入行只有3年的新人，今年只得22歲的嘉洛當然有很多角色都想嘗試。提到金城安與朱凌凌 (吳偉豪飾) 是劇中其中一對好受歡迎的CP，要嘉洛演hehe角色可會接受？他說：「梗係得啦，做演員就係要演繹唔同嘅角色，咩角色我都接受得到。」

他亦有看過去年那套話題英劇《The End of the F***ing World》，男主角Alex Lawther所演的James一角令他留下深刻的印象，嘉洛說：「我絕對想演呢個角色，佢做到我做唔到嘅嘢，我唔知自己做唔做到，希望第時有機會可以試下。對自己信心係要有嘅，但都要有自知之明，知道自己係咩位置，唔急得，要慢慢嚟。」他坦言金城安好似自己所以演得比較輕鬆：「演啲唔似自己嘅角色就係挑戰，可以滿足我嘅戲癮好緊要，愈難度高嘅角色愈會演得開心啲同享受啲。」

攝：陳順祺        場地提供：銅鑼灣迷你酒店