【有片】木村拓哉15歲細女光希首曝光 出道做女模叫Kōki
星二代由出生一刻已經受注目，雖然星爸星媽未必想仔女染指呢個五光十色嘅圈子，但如果星二代真係想進入娛樂圈，頂住父母光環可以話係事半功倍。木村拓哉及工藤靜香婚後育有兩個囡囡，一向嚴格保護，唔想畀佢哋嘅身份曝光，估唔到細女光希居然以模特兒身份，登上時尚雜誌 ── 日本版《ELLE》最新一期封面，眉宇間同木村簡直餅印一樣！相關短片同照片一出，立即喺twitter瘋傳，有網民驚嘆：「眼神輪廓都同爸爸似到十足！」
木村光希今年15歲，已經有170CM高，去年工藤靜香於IG分享一張光希嘅背影照，身穿背心短褲嘅光希露出逆天長腿，手腳纖幼留住一頭短髮，雖然見唔到樣但足以令網民暴動，工藤靜香亦隨即刪除照片。
雖然一直有唔少經理人公司打兩位千金主意，但木村同工藤紛紛拒絕邀約，亦有當地雜誌報道，指木村明白藝能界嘅辛酸，原本唔太贊成個光希出道，但光希今年已就讀高中，所以做爸爸嘅只好尊重個女想出道嘅決定。
呢次光希以模特兒身份入行，實在令大家相當驚訝。據報道指，光希女細細個就好鍾意睇《光之美少女》，又鍾意AKB48，會跟住佢哋首《Heavy Rotation》又唱又跳，難怪有傳聞指，「AKB之父」秋元康好想木村兩個女入佢啲女團，但工藤就唔想個女咁樣入行，於是先會揀做Model。
木村光希登上《ELLE JAPAN》7月號，成為封面人物，雜誌以「注目新星」介紹佢，雖然係第一次拍攝，但舉手投足相當專業，眼神輪廓似足木村拓哉。呢本雜誌極少以本土藝人作封面人物，可見佢地對光希真係相當重視。雖然頂住星二代光環，但光希似乎唔想靠父母，以「Kōki」為藝名，雜誌內容亦未有提到父母嘅名，只係講到光希依家除咗學習行CATWALK，仲學緊英文、法文及西班牙文，睇嚟有意進軍國際。
呢輯相搵嚟日本殿堂級攝影師操上和美掌鏡，製作花絮中睇到光希於拍攝現場相當專業，自動擺出唔同Pose，攝人目光令人驚艷。相片一出引起網友熱議，唔少人驚嘆遺傳嘅重要性，指光希「修長身型似足媽媽，輪廓眼神同爸爸似到十足」，更笑言「簡直好似木村著上女裝，餅印一樣呀。」