【萬眾同心公益金】羅蘭姐寶刀未老　影后級演技無人能及

《萬眾同心為公益》噚晚播出，全晚都係例排搵唔同藝人上嚟表演吓，籌吓款，都可以話幾悶，仲有阿叻做司儀，見到都唔係好想睇落去。歌手方面就有周柏豪、鍾舒漫、菊梓喬、Super Girls等，最有級數就係張敬軒，軒仔仲唱足3首歌，更排埋舞，都算幾畀面，但係都唔夠羅蘭姐搶鏡！

羅蘭姐獲公益金方面邀請，特別拍攝了一段3分鐘嘅籌款宣傳短劇《常伴你左右》。劇中羅蘭姐飾演患上大腸癌嘅陳婆婆，並需要盡快做手術，最壞情況有機會做一個人造肛門。當羅蘭姐知道自己可能要每日孭住個屎袋周圍走嘅時候就立即拒絕做手術，不過有蔚雨芯飾演嘅黃姑娘勸導下，最後都接受治療，更慢慢康復。

雖然短劇只得3分鐘，但係羅蘭姐將一個腸癌病人嘅角色發揮得淋漓盡致，由得知患上癌症嘅打擊，聽到醫生話自己有機會要做一個人造肛門同屎袋嗰種尷尬，到開始踏出一步去接受手術，嗰種情感上嘅轉化都演繹得恰到好處。睇完羅蘭姐影后級嘅演技，真係即刻有想打去1832828 捐錢嘅衝動。

雖然羅蘭姐已經83歲，自16歲就入行，至今從影已經超過60年。最為人熟悉嘅一定係飾演《七月十四》嘅龍婆，之後於1999年憑《爆裂刑警》奪得影后殊榮，成為史上最年長影后，最近連萬人迷碧咸都將同羅蘭姐嘅合照post上instagram！曾講過唔再演鬼片嘅羅蘭姐為人樂觀，亦好玩得，近年都因為工作上都扮演過聖羅蘭、英女皇等名人，仲扮得入型入格，果然寶刀未老。