【有片】蕭敬騰2億超級豪宅曝光　酒店級設施豪到嚇親人

出道時被稱為「省話一哥」，令主持人聞風喪膽嘅蕭敬騰，呢日居然傳出佢接下台灣金曲獎主持一職，仲要係得佢一個獨挑大樑。呢日記者會上播出一條老蕭嘅訪問短片講下感受，不過大家嘅注意力就落咗喺片中背景，原來拍攝地點正正係老蕭去年購入價值2億新台幣嘅豪宅﹗

短片一開始見到蕭敬騰揸住3500萬新台幣嘅白色勞斯萊斯入鏡，駛入停車場後拎出鎖匙行入豪宅，裡面除咗有私人庭院外，大廳放置一部鮮紅色三角琴。沿住屋內樓梯向下行，老蕭屋企裡面居然有個私人籃球場，認真誇張﹗另一個角落放置兩部重型電單車，牆上放有數十對波鞋。

鏡頭一轉老蕭行出室外，見到一個超大嘅私人泳池，就好似六星級酒店一樣，相當誇張。據知老蕭去年3月購入呢個，位於台北南港區超級豪宅，山面湖環境相當優美。整個屋苑只有27戶，保安方面相當嚴密，張惠妹都係佢嘅鄰居。雖然呢間豪老要成2億新台幣，不過對於每年數十場商演同代言合約，年賺7億嘅老蕭嚟講，買嚟送俾自己做生日禮物絕對不為過。