【深宮計】又係植入式廣告？ 胡定欣眉心花鈿同華為Logo撞到正
撰文：關穎賢
出版：更新：
《宮心計2深宮計》昨日(5月21日)播出首集，除了睇劇中複雜的人物關係及權力鬥爭，值得留意就是女演員華麗的唐代妝容。其實唔只係《深宮計》，有好多以唐朝作背景的劇集，包括向海嵐擔正的《楊貴妃》、范冰冰的《武則天》等，劇中見到身為皇族的女角色額頭均貼上花鈿，而唐朝正是使用花鈿的鼎盛朝代。最搞笑嘅係有眼利嘅網民睇trailer時，發現胡定欣額頭上的花鈿竟然好似華為logo，相信應該可能或者唔係植入式廣告嚟(好似係)。
講返「花鈿」，其實係指貼喺兩鬢、眉間、眼尾或者面頰上嘅花型裝飾物，令女士美貌更添動人，係唐朝妝容上嘅特別之處，不過只有妃嬪先可以畫。花鈿嘅顏色主要為紅、綠色同黃色，而形狀方面就好多元化，好似梅花形、桃花形、牛角形、扇形、圓點形等。妃嬪地位越高貴，圖案就會越花巧，同時越大朵嘅花就代表位置越高，有時都會貼上金箔同寶石去突顯其地位，通常都會以黑光紙、魚腮骨、雲母片等材料製作，再以阿膠貼上額頭，卸妝嘅時候用熱水敷一陣即可。好似劉心悠咁，一開始做宮女嘅時候眉心都冇畫任何花鈿，去到變成玲瓏公主之後先畫上花鈿。
咁到底幾時開始有「花鈿」嘅出現呢？其實都有幾個講法，其中一個就係喺公元677年，上官婉兒因為才學過人被武則天提拔，由奴婢「升呢」做機要秘書。之後被武則天發現男寵臣鍾意上官婉兒，所以嬲到揮劍畫花上官婉兒眉心，仲留疤。身為好朋友嘅太平公主喺上官婉兒眉心畫咗朵梅花，令上官婉兒添上幾分嫵媚，令到唐朝盛行呢個「梅花妝」。亦有另一個講法，就係喺南朝《宋書》入面有提及過宋武帝劉裕囡囡壽陽公主正月初七喺含章殿瞓覺，有朵梅花跌咗落公主嘅額頭，仲染成花瓣形狀，獲宮中妃嬪爭相模仿。