《學是學非》湯洛雯馬爾代夫單身大解放：平時唔會咁性感嘅！

無線節目《學是學非》今日（21日）拍攝外景，期間成班好姊妹送上生更日蛋糕，預祝Tiffany（劉穎鏇）21歲生日，真係好有驚喜。

而湯洛雯剛剛去完馬爾代夫旅行，又回復單身，仲係IG放閃, 經常po性感泳衣照，吸睛程度不容忽視，湯洛雯笑言：「其實我當日着咗件普通小小嘅泳衣，當地環境真係好靚，唔通你要我着樽領泳衣咩！咁梗係影返多啲相留念啦，又比左咁多旅費。」

湯洛雯回復單身，係咪因為咁所以大解放呢？洛雯續說：「前度男友有講過其實都唔係咁鍾意我咁着，但佢又唔會特登話我，一定唔可以，咁我自己都幾尊重男朋友嘅，如果男朋友唔鍾意，我就唔會着囉，因為嗰度地方好靚，所以我想影返多啲相，着靚啲，就算我而家單身，平時都唔會着到咁性感嘅。」