【專訪】余允抗唔做導演照關心電影業發展：依家的確係青黃不接　

另一篇文講咗《山狗》導演余允抗點解會咁突然離開影圈，不如呢篇文就講下其實佢點樣睇依家嘅電影。不過，喺探討呢個問題之前，我哋好應該問余允抗到底今時今日仲會唔會睇戲。正所謂「最鋒利嘅刀又點會生鏽」，余允抗就話佢睇戲都睇得幾密下：「舊戲新戲都睇，平日6點幾收工後，返屋企食完飯到7、8點，我多數睇套戲先瞓，我11點左右就瞓。差唔多每個禮拜都有2、3套戲，我呢個年紀夜晚就係做呢啲咋嘛。」

【專訪】《山狗》導演余允抗拍7套片就收山　原因其實好簡單？

【專訪】余允抗最滿意作品竟然唔係《山狗》　最後答案包你估唔到

咁近期最欣賞邊套？余允抗就話最欣賞就係老友許鞍華嘅《明月幾時有》：「林超賢嘅《紅海行動》、《湄公河行動》都好得，小品嘅就張艾嘉嘅《相愛相親》。其實呢幾套戲可以睇到依家中國電影嘅形勢。一係就大製作，搵最紅最勁嘅導演、演員，輸極有限。一係就老細好鍾意個劇本，覺得唔會蝕死自己，就試下拍。」

講返之前金像獎許鞍華第六次拎最佳導演，會唔會覺得新一代好似追唔上新浪潮嘅導演？余允抗真心覺得影圈有青黃不接嘅情況：「唔係話新人冇能力，係覺得佢哋參與度唔夠。可能有好多原因，一係就睇唔起班老嘢，一係就太有個性，一係就唔認同呢個行業或者組織。我唔相信上一代人唔侵新一代玩，你要有參與先會改變到現狀。」其實呢番說話真係幾有參考性，唔單止講影圈，仲係講緊香港社會。