【逆緣】江欣燕隔2年再登螢幕　眼濕濕稱冇放棄過：拍劇好快樂

《逆緣》中除了夏文汐、林夏薇、于淼等甚得網民歡心的女演員之外，其實還有一位很少出現在電視螢幕上而大家又很熟悉的人，那位就是江欣燕（欣欣）。上一套欣欣有份出演的電視劇，已經是2年前（2016年）的《為食神探》，而為甚麼欣欣今次會「出山」拍劇呢？她説：「其實都係角色同時間啱，舊年好早amy姐（《逆緣》監制）就搵我嘅。」

江欣燕2013年與結婚12年的丈夫離婚，2年前父親過世。談到這次拍劇的決定，她説：「個天成日都想我休息，都係有人搵我我先拍，因為個天係我經理人，所以都係隨緣囉，哈哈。（呢2年一直都好少工作拍劇？）其實我一路都有做嘢，時不時都會有內地商演活動，都夠使夠食嘅。」看似欣欣近年工作量大減，實質她很享受現在生活。「我不嬲都視工作為玩，咁係咪做人開心啲呢？」當然，欣欣「玩」時仍然是非常專業的。

江欣燕續說：「因為我本身對TVB有情意結，因為我細個係睇呢個台大，我覺得TVB係香港人嘅電視台。我每次返公司都同自己講，呢度係我嘅魔法學校，我好多嘢都喺呢度練成。我差唔多由17歲第四屆訓練班就開始我的事業。我得唔得，好多嘢都由我入行開始發生，我從來都冇放棄過拍劇做演員。」講到呢度，欣欣仲有啲眼濕濕添。「人生真係好得意，有一日突然之間內心有個聲音，會覺得好想做返自己，再『落返田』拍嘢，原來係一件好快樂嘅事。」