【深宮計】馬國明黃心穎邊拍劇邊談情？ 「我哋工作時工作」

無綫重頭劇《宮心計2深宮計》舉行記者會，在劇中飾演一對而現實生活中又是情侶的馬國明 (馬明) 與黃心穎當然有拍拖出席啦，兩人仲孖住做訪問。問到情侶檔上陣拍劇談情會否特別sweet？馬明說：「唔關事，要睇劇本同角色。」心穎就話：「可能啲人會以為我哋咁樣好容易拍，其實唔一定，因為個角色同真人係唔同嘅人嚟。咁我哋今次都拍得好舒服，好自然，佢係一個十分專業嘅對手，會帶到我入戲。」咁今次咪可以寓工作於拍拖？心穎即笑言：「我哋工作時工作㗎。」

兩人又表示雖然拍這套劇過程辛苦，幾日無得瞓是等閒事，但當他們做後期配音時，睇到拍出來的成果就好有滿足感。心穎話兩人的感情戲和喊戲對她來說都有難度。拍攝期間她更捱病了：「咳咗兩個禮拜，夜晚咳到醒，但就感覺到人間溫暖，啲同事好關心我，畀咗好多藥同沖劑我，所以病有病嘅好，好多人照顧我。」而馬明就謂最辛苦是要落住雨拍打戲：「有一場打戲喺森林拍，落住雨成地泥，拍完我都成身泥。」