【爛鬼Cult噏】余允抗收山作《凶貓》唔合格？　恐怖位照樣嚇破膽

Cult片王余允抗執導嘅《山狗》、《凶榜》都真係好傑作，但佢嘅電影生涯其實唔止拍過呢兩套戲，喺1980年至1987年間佢就先後執導過7套電影，而恐怖片《凶貓》就係佢嘅收山之作。不過，好多人都話《凶貓》及唔上《山狗》、《凶榜》，咁事實上係唔係咁呢，又係唔係冇值得一讚嘅地方？不妨睇完下面嘅文字再下定論。

【爛鬼Cult噏】余允抗豹隱30年首談《山狗》：我逼到蛇佬癲咗！

cult片王《山狗》虐殺輪姦超變態　鄭則仕仍然心寒：覺得導演痴線

電影《凶貓》係喺1987年上映，由劉家良、鄭浩南、鄧麗盈、王晶同徐淑媛等演出。故事就講述劉家良係天師嘅後人，成個家族嘅使命係收伏一隻為禍咗幾百年嘅貓妖，而呢隻貓妖就因為地盤施工而無啦啦衝出封印，之後不但到咗一棟大廈度大開殺戒，更先後上咗翁世傑同徐淑媛嘅身。癌症末期嘅劉家良同埋佢新收返嚟嘅徒弟鄭浩南就打算用符箭收伏貓妖，可惜最後佢哋都係不敵貓妖，逐一身亡，而貓妖結局時仲冇死到兼上咗飾演警察嘅王晶身，絕對係一個Sad Ending。

其實呢套戲有好多地方好好睇，好似臨尾被貓妖上身嘅徐淑媛喺差館大開殺戒時，真係幾令人覺得可怕。不過就算係咁，都真係比唔上《凶榜》，點解呢？或者余允抗本人可以畀到答案大家：「《凶榜》之所以恐怖，係因為觀眾去到後段先睇到隻鬼，之前係唔知到底咩事；但觀眾喺《凶貓》裡面好快見到隻貓妖，所以冇咗一種對未知嘅恐懼。」不過《凶貓》裡面都有一幕有呢種恐怖，就係電影初時鄭浩南被妖上身嘅翁世傑追殺，中間撇甩對方嘅鄭浩南，喺自己屋企度又見到翁世傑，但翁世傑完全冇異樣，鄭浩南放低戒心同對方講頭先發生咩事時，翁世傑先至認自己係貓妖，而我作為一個觀眾，就係喺懷疑緊翁世傑係咪貓妖時感覺個氣氛好恐怖。

當然，套戲真係有好多處理得唔好嘅地方，甚至造成情節上嘅唔合理，好似明明劉家良得返幾日命，點解仲可以咁精神去捉妖，而鄭浩南同鄧麗盈嘅感情線亦非常離奇，觀眾淨係見到鄭浩南非常傾慕鄧麗盈，但冇耐佢哋兩個就連床都上埋。我自己就覺得呢套戲比起余允抗嘅兩大Cult片係失色嘅，但唔算難睇，你哋又點覺得呢？