謝安琪喺老闆麥浚龍面前Hard Sell自己好演得：可塑性好高

謝安琪（Kay）早前同幻國文化娛樂簽約五年，成為麥浚龍（Juno）旗下嘅藝人。今日，Kay同Juno就拍住上出席品牌活動，兩人仲明顯夾過齊齊著黑色。Juno受訪時就話自己真係好鍾意著黑色衫，因為夠哂好襯。講到今次佢哋係首次「老闆員工」檔出活動，問酬勞係咪平分時，Kay就話要爭下先：「好似啲歌咁，都要爭，爭唔掂就合唱。」提到Kay喺年尾出新碟，問兩人會唔會合唱，Juno答：「合唱就之後嘅事，依家忙緊為電影《風林火山》做後期，但因為個維也納剪接師入咗醫院，套戲最快要2019年先上到。」

咁之後會唔會搵Kay拍戲？當聽到Juno讚自己係好演員後，Kay就勁Hard Sell自己：「我可塑性好高，依家每日都有唔同體驗，享受人生，會勇於嘗試，又會發掘趣事，唔會因為隨年紀而覺得生活好乏味，可以做喜劇，因為依家生活都幾喜劇。」至於講到有傳Juno會同薛凱琪簽約，Juno就話呢個只係傳聞嚟。