十大曾效力TVB男星童年相 黎明驚似小丸子
昨日睇完一眾 TVB 現役女星嘅學生相，今日繼續同大家睇吓十位曾經效力無綫嘅男星的童年照，我哋知好多大家都可能見過，所以盡量搵啲比較少曝光嘅相，睇吓你哋又認到幾多個！
古天樂
被同事形容肥到好似林雪咁嘅BB，估佢唔到竟然係影帝古天樂呀！細細個嘅古仔真係好可愛好可愛好可愛，可愛到想搣佢面珠仔，不過如果對住依家嘅古仔，應該未行埋去已經被佢凌厲嘅眼神嚇至退避三舍。
陳鍵鋒
大家好耐無見過嘅陳鍵鋒，依家在內地發展得相當唔錯，佢於內地古裝劇《美人心計》中飾演第一男主角劉恆，被譽為「史上最帥皇帝」。陳鍵鋒五官標緻，不時在劇集中以女裝示人，而毫無遺和感。細個時嘅陳鍵鋒，雖然五官不及長大之後咁立體，不過都有幾分女仔嘅嬌氣。
鄭伊健
鄭伊健早年憑《古惑仔》系列，飾演陳浩南一角紅遍中港台，長髮加帶點殺氣而深情嘅眼神，擄獲不少少女（依家可能已經變成師奶）嘅心，但BB仔時嘅伊健圓碌碌，笑起來人畜無害（雖然個個B仔笑起嚟都係天使一樣），同依家嘅伊健真係分別好大啊！
王祖藍
王祖藍細細個影相已經招招積積，表情多多，眼大大相當可愛，好似同依家唔係好似樣呢！
黎明
其實呢個都易估嘅，小時候嘅黎天王帶有幾分傻氣。再睇真啲，頂住一個冬菇頭嘅黎明，其實真係有幾分似第一代小丸子真人版演員森迫永依。黎明剛剛榮升爸爸，唔知BB又生得似唔似佢呢？
林峯
林峯貴為廈門李嘉誠個仔，細細個已經一副老闆樣，面圓圓，額頭勁高，聽講額頭高嘅人特別聰明，不過可能峯哥演藝歌唱事業特別出色，所以唔係好睇得出佢嘅其他才華。
梁朝偉
影帝朝偉自細就有一雙憂鬱的眼神，而另一張擺出如來神掌嘅相，細細個就鐘意武術，似乎係佢日後成為「一代宗師」嘅伏線。
周星馳
星爺細個都係一個大頭仔，笑起上嚟都幾可愛吖！
黃宗澤
相信大家都見過黃宗澤17歲選校草嗰張相，呢兩張年代久遠啲嘅 BB 相同童年照大家又有無見過呢？ BB 嗰張相塊面圓碌碌好可愛，另一張大約十歲，抱住貓嘅相，輪廓開始明顯，果然細細個已經係型仔。
張家輝
細個嘅家輝有點怕醜腼腆，同欠缺一點自信，而依家不只係七料影帝，仲做埋導演，家庭美滿事業有成，成個人自信晒！
吳卓羲
吳卓羲細個對眼好大啊！加上頭髮長過耳仔，有幾分似女仔，都幾可愛！同依家行型男路線，真係分別好大呢。