謝霆鋒回歸樂壇明年香港開騷　想開戶外場竟被大球場拒組？

近年醉心於廚藝嘅謝霆鋒早前都講過今年將會回歸樂壇，佢亦都冇令樂迷失望，除咗喺叱咤頒獎典禮同KKBOX風雲榜驚喜亮相之外，仲推出咗三首新歌。有報導指霆鋒明年會舉行巡迴演唱會，而香港將會係巡迴首站，不過霆鋒出席公開場合嘅時候都講過想喺戶外場地開騷。據知霆鋒所屬公司英皇已經分別申請五個室外場地包括迪士尼露天場地、中環海濱活動空間、西九、啟德郵輪碼頭及大球場，好可惜大球場方面已拒絕租唱。

有消息指英皇有意將演唱會移師到紅館舉行，但因為霆鋒對演唱會無論舞台、音響同視覺效果要求都好高，之前霆鋒都講過想演唱會可以大家企起身，好似嘉年華咁，亦嫌喺紅館開騷悶，所以到現時都未能落實。另外，據知霆鋒經理人霍汶希都承認大球場拒絕租場，同時都因為噪音管制問題令音響未能達到要求。不過因為都知道大家好期待霆鋒開演唱會，所以將會再開會商討。