【逆緣】夏文汐為忘年戀瘋狂不合理　唔通為林夏薇黑化鋪路？

兩個人喺埋一齊最緊要簡簡單單、開開心心，畢竟社會上人與人的相處已經夠晒複雜的了，如果對住自己另一半都仲要猜猜度度，咁就真係……

【感情最忌試探　翁芷蕎仲要勁over】

呢個咁簡單嘅拍拖相處之道，《逆緣》中的翁芷蕎（夏文汐飾）無「奶油」唔知，話晒佢年紀唔細，又撈過娛圈大染缸，後生時又被福岡雅治（和泉素行飾）呃上床搞大個肚生埋庄司晨（林夏薇飾），感情上的閱歷夠晒豐富。翁芷蕎之後又同汶萊王族有過關係，單係同王族有過交往呢一點，翁芷蕎喺感情上就應該好識得拿捏分寸，更會知道最忌手段同試探，但佢竟然唔聽湯澤澄（黎諾懿飾）電話，目的只係欲擒故縱、欲拒還迎，仲話：「故意唔理佢，睇佢咩反應。情場如戰場，男女間嘅事有時都要玩吓手段，我咁做係想試探佢有幾愛我。」

如果真係只為試探，唔聽幾次電話問題唔大，但做咗大半世人、閱歷豐富的翁芷蕎仍然唔識過猶不及，事關放大佢電話通話記錄睇睇，足足無聽男友湯澤澄電話87次呀！如果我係湯澤澄，頭十個電話會以為翁芷蕎工作忙緊唔得閒聽，第二十個電話唔聽會開始擔心翁芷蕎有意外，打到第三十次都唔聽就會心諗對方應該係攝高枕頭諗清楚唔想拍拖故意躲避，於是就唔會再打第三十一個電話去打擾。所以，湯澤澄足足打咗87次都算好好毅力架喇，翁芷蕎仲覺得未夠誠意？唔通要打足70個7次？

【愛情令人失去理性　翁芷蕎愛得不可理喻　連個女都可以唔理】

其實翁芷蕎都唔再係29+1啦，去到呢個年齡嘅人都只會好好把握時間享受愛戀，唔會嘥時間、心神玩手段，但佢偏偏玩到over晒，難怪湯澤澄之後飛咗去英國唔話俾翁芷蕎知，因為根本聯絡唔到佢。不過，翁芷蕎呢個時候睇到湯澤汶（何綺雲飾）喺電視新聞上話：「我細佬拍拖可能係for fun」，並從而得知男友湯澤澄飛咗去英國後，就發晒爛渣：「之前講到有幾咁愛我，原來just for fun！」

直到湯澤澄回港後立即搵翁芷蕎，兩人再度見面，翁芷蕎都只係識得怪對方：「你一下子玩失蹤，一下子又玩深情，我無咁多時間陪你玩。」但誠如湯澤澄解釋：「明明係你唔聽我電話，唔覆我訊息。」俾在一般人，面對一個咁扭橫折曲嘅人，即刻反面都似，語氣絕對唔會好似湯澤澄咁好，但湯澤澄邊解釋邊氹，而翁芷蕎又真係三言兩語冧返晒，仲肯即時跟男方離開香港，就連自己當初誓神劈願話要認返個女庄司晨（林夏薇飾）嘅事都立即拋諸腦後，瘟仔要緊！

【一切只為庄司晨黑化鋪路？】

以翁芷蕎的角色背景、經歷而言，佢喺感情上的言行真係有啲唔合理，更加偏向於似一個不諳世事、被寵壞了的少女。不過，如果話要塑造一個自私自利再度拋棄女兒的媽媽，從而逼使庄司晨黑化，咁就真係有啲無可奈何。

【逆緣】黎諾懿高富帥仲要肯花心思 難怪閱歷多如夏文汐都被攻陷

【逆緣．龍羽居士】周星馳成名作靠佢執導 而家竟然做咗TVB綠葉