【星光大道】細細粒為節目才藝盡出　宣布奪冠後反應竟然係……

細細粒（陳嘉佳）自從簽約王祖藍公司後，頻頻現身內地各類綜藝節目，日前她又飛到北京為央視的《星光大道》與一眾內地素人進行才藝對決。雖然錄影當日細細粒狀態唔係咁好，但憑其十八般舞藝掌握現場氣氛，最終與另一位內地精英齊齊成為一周冠軍。不過，當主持人宣布結果時，細細粒都似乎唔係太相信自己嘅耳朵，呆足一分鐘，要旁邊嘅選手提佢先「回魂」並一秒爆喊。

對於自己奪冠一事，小寶就話都幾難以置信：「雖然我真係好努力練咗好耐，但因為又要講國語又要好短時間內換衫好緊張，加上個個都臥虎藏龍，所以我真心係冇諗過有獎攞。」問到整個比賽中最難忘環節，細細粒笑言是與內地高手「舞鬥」部分：「首先嗰個環節嘅現場氣氛好好啦，同埋你哋咪睇我肥嘟嘟，我又真係幾靈活㗎喎，拉筋同埋係咁轉圈都難唔倒我，評判都有讚我話我咁都仲保持到燦爛笑容好可愛，有機會係喺嗰個環節加分嘅！」
 

表面上，細細粒成日都係食同食，但其實佢每次參加綜藝節目前，都做足準備，除今次佢練歌練通宵外，日前佢參加另一個內地節目《喜劇之王》時，再以韓紅造型上陣的她，一出場就先整首《絨花》及《LET IT GO》，之後再以小鳳姐造型，唱出《上海灘》、《紅日》等廣東經典歌，不過，最令觀眾震撼嘅係佢大跳BEYONCE嘅《CRAZY IN LOVE》再使出「電臀舞」，呢啲真係唔係即場執生就做到。