【專訪】前有線主播曾美華育兒有自己一套：其實我係Lazy Mum

前有線電視主播曾美華（Carman）雖然已經離開咗新聞直播室，但間中都會返娘家開工，繼兩年前同仔仔女女出埠拍《帶阿B去旅行》，最近佢便為奇妙電視節目《小店大廚 - 台灣篇》介紹當地美食。Carman笑指自己主要是飲飲食食同《小店大廚 - 台灣篇》打卡影靚相：「最正係食虱目魚肚、魚丸，好抵，港幣8.5咋！」同小朋友去旅行開心啲定係自己一個？佢就咁睇嘅：「帶埋仔女去旅行就難打卡影靚相，但係有埋佢哋會開心、溫馨好多。」

自從2011年Carmen下嫁黎智英次子黎耀恩後，好多人都開始話佢係「幸福少奶奶」又或者「闊太」，但佢就話其實唔多鍾意呢啲稱呼：「就算係『最美麗女主播』呢啲光環，我都係唔鍾意，明明我已經唔係做緊主播，曾美華就係曾美華。」而佢亦都覺得自己係需要工作：「我鍾意玩，做唔到全職媽媽，呢個世界仲有好多嘢可以試，同埋返工可以到小朋友榜樣，等佢哋知返工先至可以有收入。比起High Tea、Shopping，我鍾意去旅行多啲，我希望仔大女大後可以做一次背包客，呢個都係我Bucket List其中一樣嘢。」

相信好多人都會覺得Carmen嫁得好好，老公好錫佢，又有大屋住，又湊夠一仔一女，其實佢自己都咁覺得：「真係感恩，特別係有一對小朋友係好Complete Your Life。」咁會唔會有啲點樣嫁得好嘅貼士？佢就咁答：「其實係百客愛百貨，百貨應百客。有啲人好鍾意我呢種性格，有啲人就覺得我太大癲大肺、唔夠莊重，你永遠唔知咩人鍾意呢種人，呢啲係緣份嚟。其實拍拖又好，結婚又好，都唔係最難嘅一部分，之後經營婚姻先係最難嘅部分，特別係女人生咗BB後，好似『脫胎換骨』咁，成個人脾氣暴燥咗好多，明明冇嘢要嬲老公，但好似睇佢唔順眼咁。」所以佢好開心老公好識得包容、體諒佢。

講到Carman大仔依家五歲半，囡囡四歲，佢就話其實佢兩個都好好湊，不過係比較有主見啲咁：「用玩具、食物係氹唔到佢哋，一定要講道理先肯聽你講。」至於有咩湊仔心得，佢就笑指自己其實係個Lazy Mum：「我自己就鍾意『放手』嘅，唔鍾意係咁帶小朋友上興趣班，就算去上堂學法文、韓文、日文，都唔及帶佢去旅行，親口同人講『Kamsahamnida』或者親眼見識巴黎鐵塔。」

咁會唔會生第三個？Carman就話唔會喇：「其實係對香港有少少失望，特別係教育制度，好多方面都係扼殺緊小朋友嘅創意。我係填鴨式教育出嚟，我唔希望我嘅小朋友變成填鴨，所以我畀小朋友讀國際學校，但係係最平嗰隻，我唔想佢哋有所謂讀貴族學校嘅光環。或者有人會覺得咁都好離地，但我覺得小朋友係應該要成長得開開心心、冇壓力。」