【刑事偵緝檔案】大勇被煩膠未來岳母語言欺凌　娶人個女惟有死忍

無綫深宵時段重播的《刑事偵緝檔案II》，每集除了睇大勇、義仔查案外，他們的感情生活，也吸引到觀眾當新劇晚晚追看。大勇和Jessie這一對，近日出現了小三藍嘉文，跟大勇發展出曖昧關係。不過講到大勇感情面對的最大障礙，其實是未來岳母，每次見親大勇都會用語言直線「抽擊」，句句有骨，最讓人意想不到是演開慈母的蘇杏璇，演出尖酸刻薄的角色，一樣無難度，這位香港電影金像獎的最佳女配角，演技確是厲害。

劇中大勇和Jessie的感情，近日受到不少阻力，雖然說新角色藍嘉文登場，令Jessie也感到情敵出現，但大勇就十分好仔，完全無動心。最令他無癮的其實是Jessie媽媽，由老戲骨蘇杏璇飾演，她由上一輯故事開始，已經講到明反對女兒跟警察拍拖，所以每次同未來女婿見面，也是單單打打，而且當正大勇係奴隸獸，要跟埋女兒去旅行做電燈膽外，還叫大勇幫她買行李篋，之後錯手整爛個篋，卻反過來怪責對方，更藐住大勇話「好貴咩？畀返錢你囉」，到女兒Jessie話係濕碎錢不會計較，她即時食住上，「濕濕碎碎啲嘢都斤斤計較，都唔係幾好啫」，語氣面口相當乞人憎。

其實大勇同女友Jessie，孖住好兄弟義仔夫婦去日本玩，都係諗住可以二人世界，但未來岳母就擺到明要阻住二人進一步發展，甚至大勇、Jessie在房中談心，Jessie媽媽都會突然殺入房，大大聲話「傾偈出廳啦，係間房做咩？」。相信不少男觀眾睇到這裡都會暗暗點頭，大讚劇情夠貼地外，更戥大勇唔抵，甚至覺得身同感受，同女友拍拖，要招呼埋女友媽媽，但想娶人哋個女，幾谷氣都要死忍。

相關文章：

【刑事偵緝檔案】郭藹明劇中當小三　高學歷知性美完勝郭可盈​

【刑事偵緝檔案】警署飯堂又有連環殺手　今次兇手係老闆李國麟

蘇杏璇在2013年因中風後引起併發症病逝，從影近42年的她，最為人熟悉的是一系列劇集中的慈母角色，曾在無綫劇集《新紮師兄》飾演梁朝偉媽媽，而在《義不容情》又撫養4名非自己親生的子女，而她被飾演養子的溫兆倫殺害時，令觀眾留下深刻印象。蘇杏璇在90年代息影開設素菜館，只是間中在劇集客串，而在2011年杜琪峯的電影《奪命金》，飾演被銀行誤導投資的師奶娟姐，憑該角色贏得2012年香港電影金像獎的最佳女配角，現時劇迷只能在重播的劇集中欣賞她的精湛演技。