【偶然‧徐志摩】馬浚偉身兼五職搞舞台劇：為藝術貼錢都做

大眾對於馬浚偉的印象，幾乎可以說是單一的，「正直」、「君子」、「乖仔」，因為他在TVB演過的角色，可以說是清一色正義凜然的角色。有人覺得馬浚偉看來乖巧聽話，似是會在TVB拍一輩子戲，聽由天命，是安守在框框中的人，可是事實卻是剛剛相反，他是一個不安本份，要不斷突破自己才有滿足感的人。因此，他在入行第19年，毅然決定提前與TVB解約，走出框框，近年更「攞苦嚟辛」，搞舞台劇《偶然‧徐志摩》。

馬浚偉在TVB時只是當演員，而演員只有一個責任，就是演好自己的角色。許多人說，做演員好辛苦，而馬浚偉卻越級挑戰，不只走向舞台劇，還要自己寫劇本，還要找投資者、找演員，一手一腳去籌備整個舞台劇，同時身兼編、導、演、監、唱，問到他最享受哪個身份，他沈思了一會說：「我諗我依家就好難拆返開，五個身份我都鐘意，而且係要五個身份集合埋一齊，我先會覺得有足夠嘅滿足感。」在整個過程中固然有不為外人道的辛酸，但馬浚偉最後得到一個很強大的滿足感。他說過曾多次在街上哭，當時他也問自己為什麼要如此辛苦，而現在他已經找到答案。

離開TVB時，馬浚偉40歲，一般人在這個年紀都會選擇安定，而他卻是選擇走一條有挑戰性的路：「舞台好玩嘅地方係，你發覺同以前啲嘢唔同㗎，尤其是你演戲去到一個樽頸位，唔知點去衝破一啲嘢，你就嘗試去了解舞台，你就會變返一個BB，你就會覺得，不如有啲嘢重新開始學起吖，學返出嚟點樣企，學返咩叫give and take，咩叫listen，我自己都用咗兩年幾三年時間去了解舞台，自己睇咗好多書，睇咗好多documentary(紀錄片)，去睇好多舞台劇，請教好多前輩，出嚟舞台應該係點，到依家都要繼續學習。搵返呢啲嘢，可能先知咩叫做戲。」

在香港搞藝術，一般都好難賺錢，而這次舞台劇單是演員，就找來了兩屆視后胡定欣，及資深演員姜大偉、馮素波及李龍基等，身價自然非一般，再加上大量的宣傳工作，整個製作成品高昂。打開算盤一算，在帳目上能平手離場已經不錯了，所以馬浚偉說他必須同一時間努力去做一些商業賺錢的工作，用來平衡開支，他說：「我賺晒啲錢返嚟，擺晒喺銀行，或者拎嚟買車買樓呀？買啲唔等使嘅嘢呀？我又唔會喎，我寧願將部份嘅錢用嚟做一啲表演藝術嘅嘢。」

雖然這齣舞台劇不獨馬浚偉一人投資，有支持他追求藝術的朋友，明知搞舞台劇不會賺大錢，仍然願意出錢，馬浚偉亦盡力去達致收支平衡，免得讓投資者虧損。即使他個人在製作舞台劇上，不求賺大錢，然而付出的心力，卻又是另一個高昂的成本，但在馬浚偉心目，可以完成這件事，對他來說，付出再多都有賺：「對於滿足我對表演藝術的追求，所以我需要借助舞台呢個咁充滿奇蹟，咁浪漫，咁充滿情懷嘅一個平台，去呈現我自己想創造嘅嘢，嗰種滿足感已經無辦法用錢嚟衡量，坦白講，貼錢我都會做嘅。」

攝影：黃國立

化妝及髮型：RickyKAZAF and Bonnie Tsang

場地：九龍貝爾特酒店