【果欄中的江湖大嫂】大結局播完　馮盈盈：特別嗚謝黃光亮培訓我

《果欄中的江湖大嫂》終於大結局，昨晚一班演員就約埋一齊食飯坐定定睇劇。最後一集亦都是以大團圓結局作結尾。劇中小狼女（馮盈盈飾）亦在被判刑2個星期後出獄，不過後續似乎就尚未有交代。以第一次拍劇來說，其實馮盈盈表演都相當唔錯，喊戲一幕亦有驚喜。

馮盈盈接受《香港01》訪問時說：「呢個套劇出街嘅時候幫我儲咗好多經典cap圖用，但係我每晚睇都好緊張。30集都結局都好完滿，所以我每晚都唔使精神緊張，唔使擔心又會有咩唔靚嘅cap圖出嚟。」馮盈盈表示劇中小狼女的性格其實與自己也有幾分相似。「例如小狼女發脾氣鬧人嗰啲，我屋企人睇到都話同我朝早發脾氣係一模一樣。」

初次拍劇，馮盈盈表示很多謝劇中的多位演員導演的教導以及監製的選用。「首先，喺同事方面。我想特別嗚謝亮哥（黃光亮）。雖然同場唔多，但係每次佢都好睇住我呢個新人，教我好多嘢。佢唔止講2句咁簡單。佢直情係拉住我叫我做練習。講嘢把聲點樣會響啲，表情各方面，佢仲會叫我做一次俾佢睇，好似上堂咁有心去指導我，幫我培訓。」

馮盈盈：「第2個就係幕後，細ming導演、材叔（梁材遠）仲有其他人都俾咗好多指點我，同埋又俾咗好多機會我。有好多人都話估唔到我第一次拍劇都可以做咁豐富嘅角色，我真係覺得佢哋真係好大膽。其實如果俾我做監製，我都唔夠膽搵個新人嚟做呢個角色。所以點解話有啲戲要飲醉去做，我會奮不顧身去做。因為真係唔想辜負佢哋嘅信任。」

馮盈盈：「第3就係屋企人。除咗要多謝爸爸令我可以喊得出之外，其實媽媽都好緊要。因為拍劇時候我成日拍到好夜，佢都會煲好湯俾我，又會幫我準備第2日要用嘅嘢。再加上我第一次拍劇成日都會發脾氣，好大壓力，又唔識控制情緒，返到屋企都繼續小狼女上身。其實佢都忍受咗我好多。」