肌男郭子豪為參加健身大賽　捱過7個月零收入

出名大隻的郭子豪聯同女主角黃智雯一齊出席《三個女人一個因》宣傳活動，活動未開始時，郭子豪都密實打扮加件外套，到活動開始後，子豪終於頂唔住炎熱天氣，將外套除掉露出一身強勁嘅肌肉，子豪笑稱：「其實自己唔係一個隨便裸露嘅人，你見我啱啱嚟嘅時候都係著住外套。」
 

而宣傳期間黃智雯都好入戲，經常挑逗郭子豪，令到子豪都一臉尷尬，子豪表示：「都尷尬呀，始終仲係新人，比較少經驗，現場仲要唱埋歌，近乎係零經驗。」真係估唔到郭子豪一個肌肉男人會咁怕醜呢？

眾所周知子豪一直都好努力去操弗自己，而他亦將參加一個世界知名健身比賽，佢都想憑住呢個健身比賽，成為Tvb首個藝人可以係健身界得到一個名銜。其實子豪練大隻背後都有一段辛酸史，子豪感觸地講：「其實自己去健身都犧牲好大，因為自己用左7到8個月苦練，而呢一段時間都係冇收入嘅，好彩自己都有一啲儲蓄同會間中Freelance教人健身。」聽到子豪咁辛苦先有今日嘅成績，果然不負佢爆肌男神之名呀。