苟芸慧陸漢洋視察馬會雙魚河婚禮場地 特大草地行禮勁夢幻
撰文：洪曉璇
出版：更新：
早前林子善舉行婚禮，賓客陣容之盛大仲勁過台慶，云云藝人當中最省鏡嘅莫過於待嫁新娘苟芸慧。今年2月苟姑娘上載靚相，宣佈答應男友陸漢洋求婚，疊埋心水做準陸太。最近有傳媒影到佢地孖住出巡睇婚宴場地，呢個靚場相當特別，可以舉行大型草地婚禮，胡杏兒汪圓圓都喺度行禮架。
苟芸慧呢日睇中嘅靚場位於上水雙魚河，屬馬會旗下，必須要會馬會會員或有會員幫忙先可以訂場，位置上比較偏僻，由上水搭的士去大約十分鐘，但唔可以入內，需要喺會所外落車再行幾分鐘先到，由但相對上私隱度亦會較高，啱晒性格低調嘅佢地。
呢個場地最吸引之處，一定係呢個無敵大草地。喺香港要行草地婚禮唔係話無，政府康文署旗下都有幾個場，不過公眾人物嚟講應該唔太方便；某啲酒店或者好似雨僑羅力威淺水灣婚禮都會有草地可以行禮，但係地方唔大，行完禮需要入返室內進餐。雙魚河場地有個超大型草地，如果自助餐形式可以容納300人，啱晒想舉行戶外西式婚禮嘅新人。
雖然呢個場地要馬會會員先可以BOOK，以為一定係天價？咁就錯啦，睇返官網顯示，可以設宴舉行西式雞尾酒會，或者午宴晚宴，最少100人起，晚宴人頭價都不過係$1188，單係婚宴12萬最低消費有找，已經包晒酒會期間無限量供應汽水橙汁啤酒餐酒，一小時証婚儀式、旅遊巴服務，送埋一晚客房住宿，仲可以同雪特蘭小馬影相，計落仲抵過唔少星級酒店，難怪胡杏兒同汪圓圓結婚時都會揀呢度啦，咁啱兩位婚後都好快懷孕，相當好意頭，唔知苟姑娘婚後會唔會一樣係一擊即中呢？
+3