昆凌網晒著「大肚婆裙」相　肚凸凸唔通有第三胎？

樂壇天王周杰倫2014年與細自己14歲女星昆凌結婚，婚後近4年已經生咗一女一子，育有囡囡「小周周」及囝囝「羅密歐」，湊成一個「好」字。昆凌今日喺IG破天荒曬母女正面相，著住鬆身長裙嘅佢肚突突，馬上惹嚟大肚疑雲，大家都禁留言：「又懷孕了嗎？」

周董完成香港站巡迴演唱會之後，近日到澳洲悉尼繼續演唱會，咁啱去老婆昆凌鄉下，當然要帶埋妻女同行啦。昆凌喺社交平台分享照片，仲非常難得咁文咗張拖住囡囡小周周全身合照，昆凌同女兒一齊著粉紅波點母女裝，非常可愛吸睛，由於條裙真係相當寬鬆，而且條裙嘅腰線又稍高，令人將注意力放喺昆凌個肚度，大家都懷疑呢張相係「第三胎預告」。

睇返昆凌近來嘅衣著，好似都比較寬鬆，佢好似好耐無著顯腰線嘅緊身衣著，唔通真係有咗？有台灣媒體向昆凌經理人求證，但得到否定嘅答案，經理人澄清話只係娃娃裝的關係，否認昆凌懷有第三胎。