林盛斌扮電動牛牛 阿女排隊入錢玩
撰文：冼燕珊
出版：更新：
「為人父母甚艱難！」做人阿爸阿媽唔只要努力賺錢供書教學，仲要眠乾睡濕，日以繼夜、夜以繼日咁照顧小朋友，陪瞓陪食仲要陪玩（或者被玩），廿四孝老竇林盛斌(Bob)就係一個慈父人版喇。
Bob今日喺Facebook 上載咗條短片，佢模仿內地流行嘅親子遊戲，就係爸爸扮電動遊戲，仔女入錢，就可能玩一鋪。片中阿Bob著住便服趴喺床上，然後佢啲女就逐個排隊畀錢玩，由媽咪負責收錢，阿Bob扮人肉電動牛牛，阿女一坐上去，佢就郁，氹得老婆同囡囡們笑得勁開心。
阿Bob雖然扮電動牛牛扮得好辛苦，但可以令到屋企班女人咁開心都值得吖，仲可以向阿女們收返啲錢畀老婆做私己錢，佢又可以順便減埋肥，真係一舉幾得！