羅力威雨僑笑住結婚喊住瞓　居然為咗一罐鮑魚？

羅力威和雨僑正式成為合法夫妻，佢地由朝早註冊、午宴，到晚上同親友嘅婚宴真係忙足全日。羅生羅太一直話要開心笑住享受婚禮，全日都無喊過，估唔到返到屋企，雨僑為咗罐鮑魚爆喊：「我喊到成個小學生抽搐咁樣。」到底發生咩事咁嚴重呀？

羅力威雨僑結婚慧眼訂靚場　回禮勁特別：同大家分享羅家口味

婚禮當日天公造美，羅力威雨僑於婚宴戶外草地曬到變燒豬，皮膚都變成兩截色，緊接又頻撲去晚宴，不過一切都係幸福同快樂。一對新人返到愛巢估唔到仲會發生意料之外嘅事，阿威笑住分享：「夜晚兩、三點番到屋企好肚餓，阿僑煮個麵俾我食，諗住簡簡單單開罐平鮑魚，煮完出嚟原來開咗我罐『鎮山之寶』，因為個鮑魚好大隻，我哋兩個又食唔晒，跟住佢覺得自己好似做錯事，喊住食個鮑魚公仔麵。好搞笑呀，全日大家都開開心心，估唔到夜晚喊住瞓。」

阿僑就話：「我喊到成個小學生抽搐咁樣，我覺得好對佢唔住，開咗佢罐『鎮山之寶』，其實我覺得好唔好意思，因為一番到屋企我好想慰勞吓老公，煮個麵佢食，點知煮出嚟個鮑魚仲大隻過佢碗麵，大家又食唔晒。搞到而家成個禮拜都要食鮑魚，佢而家一起身就要食鮑魚啦。」呢個爆喊理由都真係相當特別呀。

雨僑羅力威歐式喜帖曝光　經典品牌婚戒惹女士羨慕【多圖】胡杏兒御用星級影樓　雨僑羅力威森林婚照原來喺香港影

羅生羅太中午舉行西式午宴同朋友同事分享喜悅，最搞笑係雨僑得戚表示，終於可以喺老公面前證實到自己嘅「身份」：「我同我老公一路都有個笑話，就係大家對對方嘅過去都成疑，我哋識嘅時候都廿幾歲，佢成日話你係咪真係有讀大學架？唔見你啲同學嘅？你係咪籃球隊架？咩合唱團全部都唔見有、又冇相，到噚日啲舊同學嚟晒，我就可以證實到我身份啦，佢唔係娶到個特務，但我對於我老公嘅身世仲係成謎，因為佢嘅長大喺新西蘭，我仲係冇見過佢任何一個同學同老師。」