姜皓文金像獎雙料入圍唔緊張：我係怕拎唔到獎令大家失望多啲

嚟緊4月15號就係金像獎頒獎典禮嘅大日子，上年姜皓文憑《樹大招風》入圍男配角獎，可惜最終未獎項就被曾志偉抱走，觀眾們都替黑仔不值，覺得香港電影欠姜皓文一個獎。今年黑仔《拆彈專家》、《大樂師· 為愛配樂》雙料入圍，睇嚟今次是時候了，但佢自己就唔多緊張：「冇啊，我連衫都未準備好，但都好多謝大家支持，好多人都畀好多鼓勵我，有次我行喺街有個的士司機冇啦啦搖低個窗，佢舉起隻手指公讚我叻仔啊你，所以我係怕拎唔到獎令大家失望多啲。」

上年頒獎禮講到黑仔兩年拍26套戲，對電影業有莫大供獻，所以黑仔係忙到連緊張嘅時間都冇，黑仔本人親證：「真係好忙，我係睇日曆先知，咦，原來15號係頒獎禮喇，我過幾日都仲要去泰國拍嘢，之後下個月又有新戲開。」唔單止電影，嚟緊黑仔仲會撈埋電視，仲要係同TVB合作，ATV出身嘅黑仔覺得好新鮮：「我嚟緊會同TVB合作，仲有大陸嗰面一齊合拍，係警匪片嚟，好多A記嘅人都有去TVB拍劇，未拍㗎，嚟緊4月尾會有公佈。」