【王牌對王牌】張栢芝行catwalk驚艷全場　劉嘉玲用梁朝偉保駕

《王牌對王牌》呢個王牌綜藝真人騷，經常都可以邀請到大卡明星上節目玩遊戲，最新一集就有紅透兩岸三地，整個華人界無咩人唔識嘅女星，佢哋分別就係fit爆辣媽張栢芝，以及不老女皇劉嘉玲！

有呢兩位神枱級美女嘉賓坐鎮，一開始就嚟個catwalk展示吓風采，足以令人拍案叫絕，因為嗰股氣場同魅力堅係唔講得笑！而且一個37歲仲係兩子之母，另一個就已經52歲，但行出嚟仲係睇到人嘩嘩聲，真係唔到人唔服。

節目中有個環節要嘉賓們各自講自己「能人所不能」嘅事，嘉玲姐嘅例子就威喇，講親出嚟都無人能及，個個聽到自愧不如，好似係：「我曾經跟林青霞、王菲、張國榮打過麻將」、「我有一個拿獎無數的影帝老公」。屈機得令嘉賓唯有話：「這個拚不過你，太毒了。」

至於張栢芝所講嘅例子，就絕對聽得出佢以前係一個幾咁敬業嘅演員：「我連續睡十六天沒有醒過來，沒睡醒但還活著，不是生病只是太累了，所以我的家人要定時幫我貼面膜，給我餵水。」對此，有人不忘說笑調侃：「你的冬季那麼短？」張栢芝續說：「我吊鋼絲吊了十多個小時，一直在上面。工作人員要放飯，但我怕他們把我放下來之後又要重新再穿會辛苦，我就叫他們給我一個飯盒在上面吃。然後徐克導演就跳拍到另一個沒有我的戲去，所以我就一直在上面很多個小時。」聽完之後不得不佩服佢嘅敬業樂業。

張栢芝隨後更喺節目中展示30秒極速換裝行天橋，外表身材仲係想擋都擋唔住。