歐陽日華上《勁歌》外貌聲線似足張敬軒　唱跳風格有的士陳style

咦！乜張敬軒咁快又上無綫音樂節目《勁歌金曲》嘅？上個月農曆新年佢先上過去推介新歌《缺》咋喎。

相信大家都會有同一錯覺，齋睇相以為相中人就係張敬軒本人，網上亦有好多人因為呢個似是而非嘅「張敬軒」而引發討論。其實佢喺嚟自澳門嘅唱跳新人歐陽日華（Kane），近期嚟到香港四出宣傳與韓國女Rapper Kisum合唱嘅新歌《Crazy For You》。

歐陽日華不單只外貌酷似張敬軒，就連說話聲線都有八、九成相似，單憑呢兩點走進香港樂壇都足以成為一時熱話。當然，作為歌手，現場表現都好重要！歐陽日華先後到《勁歌金曲》及《樂勢力》宣傳並現場展現佢嘅唱跳能力，不得不承認佢喺3分鐘內邊唱邊跳，額頭出埋汗但氣都唔喘，可見底子相當紮實，但就如網民評價一樣：「跳舞部分佔八成，得兩成時間係唱歌，有啲本末倒置喎。係咪排舞師玩佢呀？」

有啲人更將佢同2003年時參加新秀唱跳《Ra Men Song》嘅陳偉霆作比較，指歐陽日華除咗因為個樣同把聲似軒仔而紅之外，更會因為舞姿而「紅」，只不過可能係「紅」得比較另類，帶有少少恥笑成份嗰隻。